Hurst samdi við Valsmenn

Valsmenn fengu afar góðan liðsstyrk í dag þegar Englendingurinn James Hurst samdi við liðið á nýjan leik.

Hurst var einnig í herbúðum Vals í fyrra en yfirgaf liðið um mitt sumar og gekk í raðir Crawley Town í ensku C-deildinni. Hann var laus frá félaginu og var án félags er Valur samdi við hann.

Hurst lék átta leiki með Val í fyrra og skoraði í þeim leikjum tvö mörk. Hann lék sautján leiki með ÍBV árið 2010.

Leikmaðurinn er ekki ókunnugur á Íslandi en hann kom upphaflega til Íslands er hann spilaði með ÍBV og sló strax í gegn.

Þessi 22 ára strákur hefur víða komið við á ferlinum og einnig leikið með WBA, Blackpool, Shrewsbury, Chesterfield og Birmingham.

Það er alveg ljóst að Valsmenn ætla sér stóra hluti næsta sumar og koma Hurst undirstrikar það.