Sjö sinnum skráð ófærð um Víkurskarð

Til þess að komast á milli Akureyrar og Húsavíkur á Þjóðvegi eitt þarf að fara um Víkurskarð sem stundum getur verið ófært. Með tilkomu Vaðlaheiðarganga þurfa ökumenn ekki lengur að hafa áhyggjur af akstursskilyrðum í skarðinu.

Skrifað var undir samning um gerð ganganna þann fyrsta þessa mánaðar en verklok eru áætluð árið 2016. Í samtali við Vísi í dag segir Jón Helgi Björnsson, forstjóri Heilbrigðisstofnunar Þingeyinga, að óvenju oft ekki verið fært.

Í svari Vegagerðarinnar við fyrirspurn blaðamanns kemur fram að sjö sinnum hafi verið ófært um skarðið í vetur. Fyrst var ófært í lok október og síðast í lok janúar. Febrúar hafi verið óvenjugóður.

Hér fyrir neðan má sjá þá daga þar sem vegurinn hefur verið ófær allri almennri umferð. Engin þjónusta er þó um nóttina og því geti orðið ófært á þeim tíma án þess að það sé skráð.

Þessu til viðbótar sé stundum þæfingur þegar vegurinn er ekki fær fólksbílum en fær jepplingum. Eða þá að þungfært sé sem þýði að vegurinn sé aðeins fær jeppum.

Röskun á umferð geti því verið töluvert meiri en beinar ófærðartölur gefa til kynna.

Ófært Frá kl. 21:31 31/10 2012 til kl 09:21 þann 01/11 2012

Ófært Frá kl. 21:31 02/11 2012 til kl 11:32 þann 04/11 2012

Ófært Frá kl. 17:08 09/11 2012 til kl 08:54 þann 11/11 2012

Ófært Frá kl. 06:09 17/11 2012 til kl 19:30 þann 18/11 2012

Ófært Frá kl. 19:21 21/11 2012 til kl 07:19 þann 22/11 2012

Ófært Frá kl. 06:07 27/01 2013 til kl 12:07 þann 27/01 2013

Ófært Frá kl. 19:56 27/01 2013 til kl 09:24 þann 29/01 2013