Lét drauminn verða að veruleika

„Hárið.is, heimasíðan og Facebook-síðan, varð til vegna ólæknandi áhuga mínum á hárgreiðslum og fallegu hári. Móðir mín, Hildur Blumenstein, er hársnyrtimeistari og hef ég pottþétt fengið bakteríuna frá henni," segir Edda Blumenstein sem stýrir Skemmtigarðinum í Smáralind spurð hvernig það kom til að hún opnaði vefsíðu um hár.

Ræktar áhugamálið

„Þetta er mitt áhugamál. Ég hef ekki áhuga á golfi eða fótbolta heldur hári og sinni ég því í mínum frítíma þegar ég er ekki að stýra Skemmtigarðinum," segir Edda og heldur áfram:

„Hugmyndin að því að opna heimasíðu kviknaði eftir að hafa fengið mikið hrós frá fólki í kringum mig fyrir að vera með flottar greiðslur og var ég ítrekað að leiðbeina þeim og benda þeim á síður og kennslumyndbönd hér og þar á netinu."

Gekk lengi með hugmyndina í maganum

„Ég var búin að ganga með þessa hugmynd í maganum lengi áður en ég þorði að láta til skara skríða og láta drauminn verða að veruleika.  Í fyrstu þorði ég ekki að stíga fram og tengja mig persónulega við síðuna þar sem ég hef fundið fyrir því að konur vilja gjarnan dæma hvor aðra, það er ef þú hefur of mikinn áhuga á útlitinu þá hlýtur þú að vera minna gáfuð," segir Edda sem hefur unnið sem markaðsstjóri Coca-Cola, deildastjóri markaðsdeildar Icepharma og staðið sig vel en hefur engu að síður mikinn áhuga á hári, förðun og tísku eins og margar konur.

Konur oft dæmdar af kynsystrum sínum

„Mér finnst konur oft dæmdar, af kynsystrum sínum aðallega, ef þær hugsa of mikið um þessa hluti. Einnig fékk ég gagnrýni fyrir að vera ekki menntuð sem hársnyrtir en ég hef aldrei falið það að ég er áhugamanneskja og hef aldrei veitt faglega ráðgjöf til annarra. Vegna þessa þorði ég ekki í fyrstu að segja frá því að ég væri á bakvið síðuna, vildi fara huldu höfði, og vissu bara nánustu vinir og ættingjar það en svo sá ég hversu kjánalegt það var. Ég er virkilega stolt af síðunni og öllum þeim aðdáendum sem síðan hefur eignast en núna eru 6.159 vinir á Hárið.is á Facebook.

Vill auðvelda fólki að fá hugmyndir

„Markmið síðunnar er að vera miðstöð upplýsinga og fróðleiks fyrir alla sem hafa áhuga á hári, áhugafólk jafnt sem fagaðila. Auðvelda fólki að fá hugmyndir að hárgreiðslum ásamt því að læra að gera einfaldar og flóknar hárgreiðslur, fylgjast með hártískunni, ásamt upplýsingum um hárvörur, hárumhirðu og hárgreiðslustofur sem henta þörfum hvers og eins," útskýrir Edda.

Fagleg ráðgjöf

„Katrín Sif hársnyrtir og einn af eigendum hársnyrtistofunnar Sprey hefur slegist í hópinn og veitir hún faglega ráðgjöf ásamt því að skrifa greinar um hárumhirðu, tískuna og bara allt sem tengist hári.  Ég er alveg ótrúlega ánægð að hafa fengið hana til liðs við mig. Hver veit nema fleiri eigi eftir að slást í hópinn, ef það er einhver sem hefur óbilandi áhuga á hári, fagaðili eða áhugamanneskja, þá er um að gera að hafa samband við okkur."