Efla menntun í Síerra Leóne

Fjárframlög frá Íslandi hafa stórbreytt landslaginu í menntamálum í Síerra Leóne, einu fátækasta ríki heims. En á síðustu fjórum árum hafa 340 milljónir komið í gegnum UNICEF á Íslandi til uppbyggingar í landinu.

Hæsta framlagið á Aurora velgerðarsjóður, eða 211 milljónir króna. Það er stærsta framlag einkaaðila til þróunarsamvinnu sem veitt hefur verið á Íslandi og meðal stærri framlaga af þessum toga sem veitt hefur verið til UNICEF í Evrópu.

Þá hafa stofnendur sjóðsins fjármagnað byggingar 48 skóla vítt og breitt um Síerra Leóne. Einnig lagði UNICEF á Íslandi 90 milljónir króna til uppbyggingar í landinu.

„Yfirmaður UNICEF á staðnum segir að þetta framlag og þetta verkefni sem hefur verið í gangi síðan 2008 það hafi breytt landslaginu og það er ótrúlega dýrmætt," segir Svanhildur Konráðsdóttir formaður stjórnar UNICEF.

Starfið hefur að mestu farið fram í Kónó-héraði sem varð einna verst úti í stríðinu. Skólar hafa verið byggðir fyrir peningana, nauðsynleg námsgögn verið útveguð og kennarar fengið þjálfun.

„Staðreyndin er sú að í þessu héraði þar sem við höfum verið að vinna með Auroru þá hefur skólasóknin aukist um 10%, þannig að hún er komin hátt yfir landsmeðaltalið."

Þá hefur Aurora velgerðarsjóður fjármagnað svokallaða mæðraklúbba sem veita skólunum á staðnum aðhald og stuðning. Hátt í þrjúhundruð mæðraklúbbum hefur verið komið á fót í Kónó-héraði og hafa þeir reynst áhrifaríkir við að stuðla að valdaeflingu kvenna. Svanhildur er nýkomin frá Síerra Leóne og kynnti sér meðal annars starf klúbbana. 

„Í mínum huga er það eitt það magnaðast í þessu þar sem kraftur kvenna í samfélaginu er virkjaður. Konurnar eru ekki bara að hugsa um eigin börn heldur öll börnin í samfélaginu, að koma þeim í skóla. Við hittum fræðsluyfirvöld og sáum algjörlega svart á hvítu hvað þetta hefur skipt miklu máli, hvað valdeflingin er mikil og skilningur á mannréttindum barna er orðinn miklu meiri heldur en var," segir Svanhildur.