Rændi bíl af öldruðum manni með ofbeldi - lést örfáum dögum síðar

„Hann var skilinn eftir slasaður úti á götu, tvær konur fundu hann og hringdu svo á lögguna í Kópavogi," lýsir dóttir 76 ára karlmanns sem kærði rán á laugardaginn fyrir viku síðan. Maðurinn fannst látinn um fjórum dögum síðar á heimili sínu.

Það var á laugardaginn fyrir viku sem maðurinn á að hafa verið að aka Hverfisgötuna í miðborg Reykjavíkur. Dóttir mannsins segir í samtali við Vísi að karlmaður hafi stoppað bifreiðina með því að standa úti á miðri götunni.

Því næst hafi hann fari inn í bílinn. Hann á svo að hafa neytt föður konunnar til þess að keyra inni í Kópavog. Málsatvik eru ekki skýr hvað atburðarrásina varðar. Dóttir mannsins segir það þó óumdeilt að tvær konur hafi komið að manninum þar sem hann lá lemstraður í götunni. Meintur árásarmaður var þá horfinn, en hann virðist hafa stolið svartri Benz bifreið mannsins.

„Pabbi kærði árásina og bílstuldin þann 12. janúar," segir dóttir mannsins í samtali við Vísi. Hún segir hann hafa gefið skýrslu vegna málsins auk þess sem hlúð var að meiðslum hans. Maðurinn mun hafa handleggsbrotnað í árásinni.

„Eftir því sem ég kemst næst er hann svo sendur heim í leigubíl án þess að við, börnin hans, séu látin vita," segir konan sem er ósátt við að aðstandendur hafi ekki verið látnir vita um árásina né að hann hafi leitað sér læknishjálpar. Maðurinn bjó einn að sögn dóttur hans.

„Hann lét engan vita hvað hafði gerst," segir hún.

Það var ekki fyrr en á miðvikudaginn sem maðurinn fannst látinn á heimili sínu. „Það er talið að hann hafi látist á mánudegi eða þriðjudegi," segir dóttir mannsins. Í ljósi þess hvernig andlát hans bar að var hann krufinn. Bráðabirgðaniðurstöður benda til þess að andlát mannsins hafi borið að með eðlilegum hætti. Hann hafi fengið hjartaáfall.

Dóttir mannsins segist þó ekki sannfærð um þá niðurstöðu. Það er engu að síður það sem fram kemur á dánarvottorði mannsins að hennar sögn.

Konan gagnrýnir lögreglu harðlega, meðal annars á netinu, fyrir að lýsa ekki eftir bíl föður síns, sem hefur ekki komið í leitirnar síðan faðir hennar varð fyrir árásinni.

Samkvæmt upplýsingum frá lögreglu er rannsókn í fullum gangi vegna málsins og mannsins er leitað. Ekki talið að andlát mannsins tengist ráninu að mati lögreglu, að svo komnu máli.