Þórir | Veit ekki alveg hvað er að hnénu á mér

„Ég veit ekki alveg hvað er að hnénu á mér, þetta gæti verið liðþófi sem er skemmdur, en ég sagði við Aron Kristjánsson þjálfara að ég væri klár og myndi „pína" mig í gegnum leikinn ef þörf væri á mér," sagði Þórir Ólafsson eftir 30-28 tapleikinn gegn Frökkum í kvöld þar sem að Íslendingar féllu úr keppni í 16-liða úrslitum heimsmeistaramótsins. Þórir byrjaði inn á en fór fljótlega af velli en hann skoraði samt sem áður 7 mörk, þar af 6 úr vítaköstum.

„Arnór Þór skilaði sínu vel og ég skokkaði því bara inn á í vítaköstin. „Frakkar refsa fyrir öll mistök sem gerð eru á móti þeim og það var munurinn á liðunum að þessu sinni. Við gáfum allt í þetta og erum „litla" liðið á pappírunum. Það vantaði kannski smá heppni með okkur og það er gríðarlega svekkjandi að tapa þessu í dag. Við ætluðum okkur meira í riðlakeppninni – og þetta var besti leikur okkar í keppninni en það þarf meira gegn Frökkum. Þetta dugði ekki til en framtíðin er björt og það eru spennandi hlutir að gerast hjá okkur þrátt fyrir allt," sagði Þórir Ólafsson.