"Áður en ég tók þátt var ég alls ekki viss"

Yfir 1100 stúlkur hafa skráð sig í Ungfrú Ísland sem fram fer í haust en margir hafa gagnrýnt keppnina undanfarna daga. Mjög skiptar skoðanir eru meðal fyrrum sigurvegara og kom það skýrt fram í samtölum fréttamanns við nokkra þeirra í dag. Konurnar telja sumar að keppnin byggi upp sjálfstraust og opni ýmsar dyr en aðrar segja hana þvert á móti brjóta niður sjálfsmynd stúlkna sem þurfi að hlusta á gagnrýni á borð við að þær séu ekki nógu grannar, ekki nógu brúnar eða ekki í nógu góðu formi.

Ragnhildur Steinunn Jónsdóttir, sem kjörin var Ungfrú Ísland árið 2003, sagði í viðtali við Vísi í dag að hún myndi ekki taka þátt í keppninni nú og hún hvetur ungar stúlkur til að láta það eiga sig. Hún segir keppnina ekki hafa skapað nein sérstök tækifæri fyrir sig, heldur hafi hún frekar verið til trafala.

Fanney Ingvarsdóttir, Ungrfú Ísland 2010, er á öðru máli. „Ég skil vel mismunandi skoðanir fólks á þessari keppni og áður en ég tók þátt var ég alls ekki viss með þetta, en hún hefur gert mér rosalega gott.“

Fanney segir vissulega hljóma fáránlega að keppa í fegurð en að keppnin snúist um meira en það. Hún undrast harkalega gagnrýni undanfarinna daga en tekur undir gagnrýni á að stelpurnar í keppninni séu of ungar. „Já, ég er sammála því. Ég var 18 ára þegar ég tók þátt og hefði alveg viljað vera tveimur árum eldri og vera kannski örlítið þroskaðri.“

Íris Telma Jónsdóttir, verkefnastjóri Ungfrú Ísland, kveðst hafa átt von á mótmælum. „Það er rosalega misjafnt hvað fólki finnst og margir hafa greinilega sterkar skoðanir á þessu. Það hafa náttúrulega allir rétt á sínum skoðunum.“