Umhverfisslys blasir við telja heimamenn

Bæjarstjórn Grundarfjarðar telur að umhverfisslys blasi við vegna rotnandi síldar í Kolgrafafirði og kallar eftir samstarfi við umhverfisyfirvöld. Hafrannsóknastofnun hefur verið við upplýsingaöflun í firðinum undanfarna daga. Rotnun síldar á fjörum er þegar farin að valda íbúum í firðinum ama vegna ólyktar.

Eins og greint hefur verið frá sýndu mælingar Hafrannsóknastofnunar í desember að mikið magn síldar drapst þar á stuttum tíma; á botni fjarðarins liggja allt að þrjátíu þúsund tonn af síld sem er tekin að rotna. Súrefnismettun í firðinum mældist þá mjög lág, lægri en áður hefur mælst í sjó við landið, og er hún talin meginorsök síldardauðans.

Bæjarstjórn Grundarfjarðar ályktaði á fimmtudag vegna málsins og segir að umhverfisslys blasi þar við. Þar er kallað eftir viðbragðsáætlun sem fyrst og samstarfi við Hafrannsóknastofnun, Umhverfisstofnun og umhverfisráðuneyti. Þar segir: „Ábyrgð og kostnaður vegna mögulegrar hreinsunar telur bæjarstjórn útilokað að geti legið hjá landeigendum eða sveitarfélaginu.“ Það er hins vegar skilningur Umhverfisstofnunar að sveitarfélagið og landeigendur séu aðgerðar- og ábyrgðaraðilar í málinu.

Sólveig Rósa Ólafsdóttir, sviðsstjóri sjó- og vistfræðisviðs Hafró, segir erfitt eða ómögulegt að meta hvernig mál muni þróast í Kolgrafafirði. Hún getur þess þó að mikil rotnun á hafsbotni geti valdið súrefnisþurrð. Slíkt veldur því að aðrar lífverur en þær sem nýta súrefni drífa rotnunina áfram. Þær nota súlfat í stað súrefnis en „hliðarafurðin“ af slíkri rotnun er eitrun.

Sólveig tekur fram að Hafrannsóknastofnun hafi ekki séð þess nein merki að slíkt sé hafið í Kolgrafafirði eða að hætta sé á slíkri eitrun.

Þeir sérfræðingar, og staðkunnugir, sem Fréttablaðið hafði samband við draga ekki úr því að vandi geti skapast vegna rotnandi síldar í firðinum, en margt geti haft áhrif þar á. Þó er það einróma mat þeirra að hreinsun myndi litlu skila eða vera verkfræðilega ómöguleg; magnið sé einfaldlega slíkt. Er þá kostnaður við slíkt hreinsunarstarf tekinn út fyrir sviga.

Hafrannsóknastofnun var við mælingar í firðinum á fimmtudag og í gær. Gerðar eru áþekkar mælingar og fyrr; ástand sjávarins kannað (hiti, selta, súrefni), mælingar gerðar á magni síldar í firðinum auk þess sem botn fjarðarins var skoðaður með neðansjávarmyndavélum. Niðurstöður liggja fyrir eftir helgi.