Fjallabræður, skjaldbaka og pottapartý unnu Blátunnukeppnina

Úrslit liggja fyrir í Blátunnukeppni Bjarnabæjar í Hafnarfirði. Til ljósmyndakeppninnar efndu Margrét Gauja Magnúsdóttir, bæjarfulltrúi í Hafnarfirði og eiginmaður hennar, Daði Arnar Stefánsson.

Hafnfirðingar gátu sent inn myndir af nýju bláu tunnunum við hin ýmsu tækifæri.

Þau fengu hugmyndina að samkeppninni þegar þau sáu að fólk var að setja inn myndir á Facebook af bláu tunnunum sem komu á öll heimili í Hafnarfirði um síðustu mánaðarmót.  Tunnurnar fengnar í þeim tilgangi að auka endurvinnslu á sorpi frá heimilum bæjarins.

„Þetta var okkar einkaframtak en ég hef verið að vinna að því í yfir tvö ár að fá bláu tunnurnar í bæinn,“ segir Margrét Gauja.

Hún segir að það hafi verið frábært að fá allar þessar myndir og þessar góðu undirtektir. Það sé líka gaman að sjá hversu vel Hafnfirðingar hafi tekið bláu tunnunni.

„Allar myndirnar voru æðislegar og það var nokkuð erfitt að velja, enda fór það svo að lokum að við völdum tvær myndir og eitt myndband,“ segir hún.

Vinningshafar fá USB lykil í formi vitans sem er í merki Hafnarfjarðarbæjar frá bænum. Sorpa gefur vinningshögum stílabók úr endurunnum pappír og endurunna innkaupapoka. Saffran gefur hverjum vinningshafa þrjú gjafabréf og Rósa Guðbjartsdóttir, bæjarfulltrúi í bænum, gefur bækur úr fyrirtækinu sínu.

Margrét Gauja lofaði vinningshafa keppninnar dekri á heimili sínu í Bjarnabæ í Hafnarfirði. Hún segist munu standa við það, þrátt fyrir að vinningshafarnir séu nú talsvert fleiri en í upphafi var lagt upp með.

„Ég stend að sjálfsögðu við það, enda er ég stjórnmálamaður og þeir standa jú alltaf við gefin loforð,“ segir Margrét Gauja. „Ef fólk vill koma, þá er alltaf partý í Bjarnabæ.“

Hér að neðan má sjá myndbandið sem vann, en þar er syngja Fjallabræður um bláu tunnuna og hversu ljúft sér að vera hjá henni alla tíð.