Úlpuþjófurinn gómaður - reyndist búa á höfuðborgarsvæðinu

Úlpunum, sem stolið var úr fatahengi í anddyri Fjölbrautaskóla Suðurlands síðastliðinn föstudagsmorgun, eru komnar í leitirnar samkvæmt upplýsingum frá lögreglunni á Selfossi.

Lögreglan fékk ábendingar frá almenningi eftir að mynd af ungri konu, sem tók úlpurnar, birtist í netmiðlunum DFS.is, Sunnlennska.is en Vísir birti einnig myndirnar.

Lögreglumenn könnuðu þær vísbendingar sem bárust og unnu úr þeim. Ítarleg rannsókn leiddi svo til þess að grunur féll á tvítuga konu með lögheimili á höfuðborgarsvæðinu, sem ekki tengist skólanum á neinn hátt.

Hjá konunni fundust svo tvær úlpur en sú þriðja var komin í sölu. Lögreglumönnunum tókst þó að endurheimta hana.

Verðmæti úlpnanna þriggja er um 130 þúsund krónur að mati lögreglu, sem vill sérstalega koma á framfæri þakklæti til forráðamanna Fjölbrautaskólans, sem gerðu allt sem til þurfti að góma úlpuþjófinn, og þeim einstaklingum sem komu með upplýsingar eftir að leitað var eftir þeim á netmiðlum.