„Afturför í málefnum náttúruverndar“

Katrín Jakobsdóttir, formaður Vinstri grænna, sagði í sérstakri umræðu á Alþingi í dag,  það fela í sér mikla afturför að afnema ný sett náttúruverndarlög eins og Sigurður Ingi Jóhannsson umhverfisráðherra hafi boðað.

En lögin sem samþykkt hafi verið á síðasta þingi hafi falið í sér mikla framför.

„Meðal annars sérstök verndarmarkmið annarsvegar fyrir vistkerfi og tegundir hinsvegar fyrir jarðminjar, vatnastöðvar og landslag. Þar voru útfærðar nokkrar af helstu meginreglum umhverfisréttar, til að mynda varúðarreglan og greiðslureglan. Þá var kveðið á um með skýrari hætti um hlutverk stjórnvalda og ábyrgð, sem og um verkaskiptingu þeirra á milli. Mælt fyrir um undirbúningar ákvörðunar og réttaráhrifa þeirra, og lögð áhersla á vísindalegan grundvöll ákvörðunartöku,“ sagði Katrín.

Mikil vinna hafi legið á bakvið lagasetninguna og samráð haft við fjölda aðila. Táðherra hafi boðað setningu nýrra laga en á málaskrá ríkisstjórnar sé eingöngu frumvarp um afnám nýju laganna.

„Í raun og veru er verið að boða hér afturför í málefnum náttúruverndar, því horfið er frá öllum þeim umbótum sem fólust í nýju lögunum.“

Sigurður Ingi Jóhannsson umhverfisráðherra segir að frumvarp um afnám nýju laganna verði lagt fram á næstu dögum.

„Margir hnútar voru á þessu máli síðastliðinn vetur sem þurfti að greiða úr, á endanum fannst lausn sem enginn var almennilega sáttur við. Það sem fólst í lausninni var að gildistökunni var frestað um ár sem gefur okkur núna það ráðrúm til að gera þær breytingar sem gera þarf.“

Stefnt væri að því að frumvarp um ný náttúruverndarlög verði lagt fram vorið 2015.