Farþegafjöldinn á við alla íbúa Selfoss

Fimm skemmtiferðaskip voru í höfn á höfuðborgarsvæðinu í gær. Fleiri hafa þau ekki verið á einum degi það sem af er sumri, og verða ekki fleiri ef marka má dagskrá Faxaflóahafna.

Um borð í skipunum fimm eru ríflega 6.600 farþegar og um 2.800 í áhöfn. Farþegarnir eru álíka margir og íbúar Selfoss. Stór hluti farþeganna fer í rútuferðir á meðan skipin eru í höfn, gjarnan gullna hringinn en Bláa lónið, Hengillinn og aðrir minna sóttir staðir heilla líka.

Erfitt er að slá á hversu hárri upphæð farþegar skemmtiferðaskipa eyða hér á landi. Rannsókn frá árinu 2010 sýndi að ferðamenn í dagsferðum eyddu þá að meðaltali um 12.500 krónum. Samkvæmt því eyddu ferðamennirnir um 82 milljónum í gær. Obbinn af því fer í rútur og aðra fararskjóta, en lítið verður eftir í vasa kaupmanna og verta í miðborginni.