Vetraríþróttir vinsælar fyrir norðan

Vetrar- og útivistarhátíðin Éljagangur hófst á Akureyri í gær og lýkur á morgun. Þetta er í þriðja sinn sem hátíðin fer fram og að henni standa meðal annars Vetraríþróttamiðstöð Íslands, Hlíðarfjall, Skíðafélag Akureyrar, Akureyrarstofa auk fjölda annara. Ætlunin er að kynna ólíkar vetraríþróttir fyrir fólki.

Stór og skemmtileg dagskrá er í boði um helgina fyrir hvern þann sem hefur unun af útiveru, snjó og hreyfingu. Meðal þess sem boðið er upp á er brettakeppni, sleðaspyrna, snjóflóðanámskeið, hundasleðakynning, vélsleðaferðir og þyrluskíðamennska í Hlíðarfjalli.

„Þetta hófst með vélsleðamönnum sem héldu hér til margra ára vetrarsportsýningu, en hátíðin er nú haldin í þriðja sinn undir formerkjum Éljagangs," segir Birkir Sigurðsson, talsmaður Éljagangs.

Miðbær Akureyrar er undirlagður fyrir hátíðina og hefur torginu meðal annars verið breytt í stærðarinnar stökkpall auk þess sem mótorkrosshjól munu þeysast um ísilagða tjörnina í dag. Birkir segir Norðanmenn vera mikið útivistarfólk og adrenalínfíkla enda blómstra vetraríþróttirnar þar í bæ. „Ég held það sé borðliggjandi. Það standa allir bæjarbúar að þessari hátíð."

Dagskrá Éljagangs má finna á vefsíðunni eljagangur.is.