Skóflu kastað inn um glugga

Óprúttinn aðili virðist hafa kastað skóflu inn um glugga á á heimili í miðborginni. Samkvæmt tilkynningu frá lögreglu átti atvikið sér stað skömmu fyrir klukkan sex í morgun.

Skóflan lenti á vinstri olnboga konu sem svaf á dýnu á gólfinu fyrir neðan gluggann.

Þá var tilkynnt um ökumann sem ók utan í kyrrstæða bifreið og ók svo á brott rúmlega 7 í morgun.

Ökumaðurinn var handtekinn skömmu síðar, en þá var hann búinn að aka á tvær bifreiðar, umferðarmerki og endaði ökuferðina á vegg.

Í tilkynningu frá lögreglu segir að maðurinn eigi við veikindi að stríða. Ekki er nákvæmlega greint frá því hvers eðlis þau veikindi eru. Manninum var ekið heim að lokinni skýrslutöku.