"Betra að einhverjir fái að horfa en enginn“

Álfukeppnin í knattspyrnu stendur nú yfir í Brasilíu og eru leikir keppninnar sýndir beint á íþróttarás RÚV. Sem stendur næst rásin ekki um allt land og hefur verið eitthvað um kvartanir vegna þess.

„Við höfum fengið eitthvað af kvörtunum. Fólki sem hefur áhuga á íþróttum finnst afleitt að ná ekki rásinni og okkur finnst það líka,“ segir Einar Örn Jónsson hjá íþróttadeild RÚV.

„Þetta er allt voða nýtt og rásinni var hent í gang án fyrirvara í kringum úrslitakeppnina í handbolta. Þetta er þrepavinna og þegar farið verður á fullt verður þessi rás í jafn mikilli dreifingu og aðalrásin.“

Einar segir að ekki hefði verið hægt að sinna Álfukeppninni neitt nema að vera með íþróttarásina.

„Síðast þegar Álfukeppnin var gátum við ekki sýnt neitt nema úrslitaleikinn. Það er auðvitað leitt að keppnin núna náist ekki alls staðar en það er þó betra að einhverjir fái að horfa en enginn.“

Hálfleiksuppgjör og seinni hálfleikur í leik Ítalíu og Brasilíu verða sýnd á aðalrás RÚV í kvöld, sem og báðir undanúrslitaleikir keppninnar og úrslitaleikir um gull og brons. Aðrir leikir verða sýndir á íþróttarás RÚV.