Svanurinn Örn eltir bíla eins og hundur

Þriggja ára svanur með bílaáhuga, lítill hrafnsungi sem snæðir egg þótt hann búi í sátt með hænsnum, dúfur og endur og fleiri skepnur lifa í sátt og samlyndi í öruggri umsjá tólf ára drengs í Borgarfirði. Fréttamaður Stöðvar 2 fór og kannaði þessa búskaparhætti.

Á bænum Geldingaá í Borgarfirði er sérkennilegur en einkar blómlegur búskapur. Þar heldur tólf ára drengur að nafni Markús Hrafn Hafsteinsson fjölda dýra.

Eftirlætið hans er svanurinn Örn sem Markús ungaði út fyrir þremur árum en auk hans heldur hann endur, dúfur, hænur, hrafnsunga og nokkrar kindur. Guðný Helgadóttir, móðir hans, segir Markús einkar duglegan reyndar vilji hann varla bregða sér af bæ heldur vera með skepnunum sínum.

„Hann er meira eins og hundur, eltir bíla og ræðst á þá ef þeir eru fyrir honum," segir Markús þegar hann er beðinn um að lýsa félaga sínum álftinni Erni. Hrifningin er gagnkvæm því Örn hefur elt skólarútuna og komið í skólann á eftir Markúsi, þá þurfti Guðný, húsmóðirin á bænum að bjarga málunum.

„Hann var eitt sinn kominn inn og við fórum og sóttum hann. Við höfum þurft að sækja hann um allt á bílnum út um allar sveitir," segir Guðný en bætir við að Erni þyki fremur gaman að þessum bílferðum enda hafi hann sérlega mikinn bílaáhuga. Sá áhugi kostaði hann reyndar flugfjaðrinar í bili því hann var farinn að skapa hættu út á þjóðvegi þar sem honum þótti gaman að fara og breiða út vænghafið til að stöðva umferð til beggja átta.

Nánar er hægt að fræðast um Markús og Örn í myndskeiðinu sem fylgir þessari frétt.