Sjálfstæðir Halldórar gagnrýna skáldsögu Hallgríms harðlega

Sjálfstæðismennirnir Halldór Halldórsson, formaður sambands sveitarfélaga, og Halldór Jónsson, verkfræðingur sem hefur sinnt trúnaðarstörfum fyrir Sjálfstæðisflokkinn í Kópavogi, gagnrýna bók Hallgríms Helgasonar, Konan við þúsund gráðurnar, harðlega í sitthvorum bloggpistlinum sem birtust báðir í gær.

Ástæðan er grein Guðrúnar Jónsdóttur, dóttur Brynhildar Georgíu Björnsson, sem saga Hallgríms byggir á, sem birtist í Fréttablaðinu og á Vísi á laugardaginn síðasta. Þar gagnrýnir Guðrún bókina þar sem hún hefur verið tilnefnd til Norrænu bókmenntaverðlaunanna. Guðrún hefur hinsvegar áður gagnrýnt Hallgrím fyrir skrif hans um móður sína, og vill hún meina að bókin hafi áhrif á mannorð móður sinnar, þó Hallgrímur hafi tekið af allan vafa að þarna er um skáldsögu að ræða, meðal annars með fyrirvara í upphafi bókarinnar. Því verður þó ekki neitað að bókin byggir að miklu leytinu til á ævi Brynhildar Georgíu.

Í bloggspistli Halldórs Halldórssonar stendur orðrétt: „Það er ótrúlegt og hreinlega til skammar að ritverk Hallgríms Helgasonar, Konan við 1000 gráður skuli tilnefnd til Norrænu bókmenntaverðlaunanna."

Halldór endar svo pistilinn á þessum orðum: „Það er ömurlegt að lesa þessa bók og sjá hvernig höfundurinn afskræmir ævi Brynhildar. Það er til skammar að þetta sé framlag Íslands til bókmenntaverðlauna."

Verkfræðingurinn Halldór segir skrif Hallgríms viðurstyggileg og hneykslast verulega á lýsingum söguhetju skáldsögu Hallgríms sem birtast í bókinni, á íslenska fánanum (á bls. 318) og hljóðar svo:

„Og þannig er vor fáni enn í dag, sem við flöggum framan í aðrar þjóðir af berrassaðri bíræfni, hreint út sagt ein krossriðin sáðsullandi blóðkunta umkringd fjórum bláum marblettum; dönskum, enskum og amerískum."

Verkfræðingurinn bætir svo í og skrifar: „Það er að vonum að Hallgrímur Helgason styðji Evrópusamabandsaðild sem hefur öðruvísi fána og líklega honum geðslegri (og kannski líkari klósettsetu ??) en okkar íslenski fáni sem er þó fáni þess ríkis sem er að senda honum sjálfum framfærslueyri."

Guðmundur Andri Thorsson hefur einnig verið tilnefndur til verðalaunanna fyrir bók sína Valeyrarvalsinn. Tilkynnt verður í október á þessu ári hver fær verðlaunin.