Robbie áritaði norskan rass

Aðdáandi Robbie Williams bað söngvarann um að árita afturenda sinn á tónleikum kappans í Gautaborg í síðustu viku.

Robbie fékk hina norsku Lone Martinsen upp á svið eftir að hafa séð hana veifa skilti með skilaboðunum „Plís áritaðu rassinn minn svo ég geti breytt árituninni í húðflúr“.

Lone var ekki lengi að tilkynna vinum sínum á Facebook að Robbie hefði hrósað henni fyrir flottan afturenda. Lone átti hins vegar erfitt með svefn í kjölfar tónleikanna þar sem hún óttaðist að skemma pennakrotið og að þar af leiðandi yrði ekkert úr húðflúrinu.

„Þetta er svo frábært en ég svaf varla neitt. Ég þorði ekki í sturtu og það var svo hrikalega heitt,“ sagði Lone.

Vefurinn Fremover.no birti myndir af atvikinu á vefsíðu sinni.