Það hefði átt að kalla á lögreglu strax

„Þetta er það alvarlegt slys að það hefði átt að kalla til lögreglu strax," segir Herdís Storgaard verkefnastjóri slysavarna barna og unglinga, um slys sem varð á leikskóla í Reykjavík á þriðjudag þar sem sem þriggja ára stúlka höfuðkúpubrotnaði.

Sigrún Björnsdóttir, upplýsingafulltrúi fræðslusviðs Reykjavíkurborgar, sagði í samtali við fréttastofu í dag að slysið hafi ekki verið þess eðlis að kalla þyrfti að lögreglu.

Þáttastjórnendur í Reykjavík síðdegis á Bylgjunni fóru yfir málið með Herdísi í dag og þar kom meðal annars fram að í lögum stendur skýrum stöfum að kalla hafi átt á lögreglu. Í 52. grein laga um meðferð sakamála segir orðrétt: „...ennfremur ennfremur skal lögregla rannsaka mannslát, mannshvörf, eldsvoða slys og aðrar ófarir þótt ekki liggi fyrir grunur um refsiverða háttsemi."

Herdís segir að kalla hafi átt á lögreglu „því börn hafa ekki tekið út fullan þroska. Það geta komið alvarlegir hlutir í ljós síðar, þó ég voni það svo sannarlega að gerist ekki í þessu tilfelli. Þessi mál þurfa að vera opin það, þarf að rannsaka svona þó það leiði ekki til saka," sagði Herdís í þættinum.