„Ég tala miklu betri dönsku en Henrik“

„Samningur minn við Lilleström rennur út í lok desember og ég er að horfa í kringum mig,“ segir knattspyrnumaðurinn Stefán Logi Magnússon. Markvörðurinn hefur verið í víking hjá Lilleström síðan sumarið 2009 en var í láni hjá Ull/Kisa í norsku b-deildinni í vetur.

Stefán Logi æfði með KR-ingum á mánudaginn og stefnir á að gera það aftur á morgun. „Maður ber sterkar taugar til KR. Þeir vita hver ég er og hvað ég stend fyrir,“ segir Stefán Logi sem sló í gegn með Vesturbæjarliðinu árin 2007-2009.

„Það var gaman að taka markmannsæfingu með Gumma Hreiðars. Svo talaði ég aðeins við Rúnar Kristinsson og hitti strákana,“ segir Stefán Logi sem skemmti sér vel. Hann segir þó að megi ekki lesa of mikið í að hann hafi kíkt á æfingu hjá liðinu. Hann hafi einnig mætt á æfingar hjá Stjörnunni í Garðabæ þar sem hann fær alltaf góðar viðtökur. Þeir Henrik Bödker, aðstoðarþjálfari Stjörnunnar, nái sérstaklega vel saman.

„Ég tala reyndar miklu betri dönsku en Henrik,“ segir Stefán Logi og hlær. Hann bendir á að þeir deili skoðunum hvað við kemur þjálfunaraðferðum og leikmannamálum. Hugur Stefáns Loga stendur einnig til þjálfunar að ferlinum loknum.

„Mig langar að spila í einhver ár í viðbót. Ég held að það verði nú niðurstaðan,“ segir markvörðurinn. Hann segist hafa fengið tilboð um aðstoðarþjálfarastöðu ytra og sömuleiðis hafi hann átt í viðræðum við félagslið bæði hér heima og erlendis.

„Þetta er í biðstöðu eins og er. Ég verð að sjá hvað hentar best fyrir mig sem knattspyrnumann og fjölskylduna líka,“ segir Stefán Logi. Hann reiknar með að verða búinn að taka ákvörðun áður en árið er úti. -ktd