Slor gegn hori

Íslenska líftæknifyrirtækið Zymetech hefur þróað efnablöndu sem notar ensím úr þorskinnyflum til að drepa kvefveirur.

„Efnablandan er seld í úðabrúsum í verslunum Apoteket í Svíþjóð, einni stærstu lyfsölukeðju landsins, og samningar við aðra lyfsala eru í burðarliðnum,“ segir Dr. Ágústa Guðmundsdóttir, prófessor í matvælafræði við Háskóla Íslands og rannsóknastjóri Zymetech.

Ágústa kynnti úðabrúsann og átta ára rannsóknastarf fyrirtækisins á þorskensímum á morgunfundi sem atvinnuvega- og nýsköpunarráðuneytið og Íslenski sjávarklasinn stóðu fyrir síðastliðinn fimmtudag.

„Þetta er íslenskt hugvit sem Zymetech, sem er sextán ára gamalt fyrirtæki og hét áður Ensímtækni, er með einkaleyfi á. Blöndunni er einfaldlega sprautað upp í munn þar sem hún myndar filmu og ensímið virkar í filmunni og eyðir kvefveirum og fækkar sýkingardögum,“ segir Ágústa.

Hún segir að klínískar rannsóknir á virkni blöndunnar hafi sýnt fram á að notkun hennar geti fækkað veikindadögum vegna kvefveira úr að meðaltali sex dögum niður í þrjá.

„Þorskensímin eru einungis um 0,1 prósent af heildarefnablöndunni. Afgangurinn er samblanda af ýmsum efnum sem hafa verið þróuð til að viðhalda virkni og stöðugleika ensímanna,“ segir Ágústa.

„Blandan er markaðssett af samstarfsaðilum okkar í Svíþjóð. Hér á landi eru hvorki næg þekking né fjármagn fyrir hendi þegar kemur að markaðssetningu líflækningatækja og markaðsaðgangur ekki sambærilegur við það sem þekkist í Svíþjóð. En við eigum einkaleyfið og hugverkaréttinn og getum selt sambærilegar vörur hér á landi eða annars staðar.“

Spurð hvenær úðabrúsinn verði fáanlegur hérlendis segir Rannveig að það sé enn óljóst. „Það er verið að vinna í því og ég vonast til þess að það verði fljótlega.“