„Ætlum upp næsta sumar“

Vera Víkings frá Ólafsvík í deild þeirra bestu var stutt. Eftir eitt ár í Pepsi-deildinni er liðið fallið og spilar því í 1. deildinni að ári.

Það gekk mjög brösuglega hjá Víkingum framan af móti en liðið fékk fínan liðsstyrk í júlí og eftir það var mikill stígandi í leik liðsins. Þessi stígandi kom þó of seint.

„Við vorum mjög vaxandi og mótið hefði bara þurft að vera aðeins lengra,“ segir Jónas Gestur Jónasson, formaður knattspyrnudeildar Víkings.

„Við reyndum að fá leikmenn til okkar fyrir mót en það gekk erfiðlega. Við fengum ekki þau gæði sem við vildum fyrr en of seint,“ segir Jónas, en félagið skipti út fjórum leikmönnum í júlí. Þá komu inn fjórir Spánverjar sem styrktu liðið mikið.

Ánægður með Spánverjana

„Þetta voru flottir strákar. Góðir fótboltamenn og karakterar. Þeim leið vel hjá okkur. Voru mjög duglegir að skoða landið og ferðuðust líklega meira um landið en ég hef gert undanfarin tíu ár. Þetta var ævintýri fyrir þá og þeir litu á það þannig. Þannig að þeir nutu tímans hjá okkur.“

Jónas Gestur segir að menn séu farnir að skoða framhaldið í Ólafsvík en þar á ekki að slá slöku við.

„Það eru einhverjir með lausan samning og við förum að skoða það núna. Við erum ekki af baki dottnir. Ætlum að mæta til leiks með sterkt lið næsta sumar og reyna að komast aftur upp í Pepsi-deildina.“

Spánverjarnir sterku eru samningslausir en Jónas segir að sá möguleiki verði skoðaður að fá eitthvað af þeim aftur.

„Þetta mun koma allt í ljós á næstu tveimur vikum hvernig framhaldið verður hjá okkur.“

Ejub Purisevic hefur náð flottum árangri með liðið og hann fær að halda sínu starfi áfram.

„Ejub á tvö ár eftir af samningi sínum við félagið þannig að hann er ekkert að fara. Það er ekkert endurskoðunarákvæði í samningnum við hann.“

Víkingar fóru í talsverða útgerð í sumar. Margir erlendir leikmenn og sumarið hefur því væntanlega kostað skildinginn.

Tjöldum ekki til einnar nætur

„Tekjurnar duga fyrir gjöldunum hjá okkur. Við fáum til að mynda aukatekjur í sumar út af sjónvarpsréttindum. Svo koma fleiri áhorfendur. Mér sýnist að endar nái saman, sem er gott. Við erum með styrktaraðila bæði hér á Snæfellsnesi og á höfuðborgarsvæðinu. Það má ekki tjalda til einnar nætur í þessum rekstri. Við erum sáttir við rekstrarlegu útkomuna þó svo að við hefðum að sjálfsögðu viljað sjá betri árangur á vellinum,“ segir Jónas og bætir við að Spánverjarnir hafi ekkert verið sérstaklega dýrir.“

„Það gleymdist stundum í umræðunni að fjórir fóru er við tókum inn fjóra leikmenn. Spánverjarnir voru á viðráðanlegu verði. Það er erfitt atvinnuástand á Spáni. Þeir hafa átt það til að gera fínan samning í föðurlandinu en lenda síðan í því að fá ekkert greitt. Við erum mjög ánægðir með reynsluna af þessum mönnum og við munum eflaust horfa til Spánar og fleiri landa fyrir næsta sumar.“