Íhugar að fá lögbann á framkvæmdir við stúdentaíbúðir við Brautarholt

„Nú er það bara harkan sex,“ segir Símon S. Wiium, íbúi í Ásholti í Reykjavík, en hann er einn af allnokkrum íbúum sem hafa skilað inn athugasemdum vegna byggingar stúdentaíbúða á Rauðarárholti við Brautarholt, rétt fyrir ofan Hlemm. Skipulagsráð samþykkti málið úr nefnd síðasta miðvikudag.

„Þetta stefnir bara í stórslys,“ segir Símon, sem hefur búið í hverfinu í fimmtán ár. Hann gagnrýnir fyrirhuguðu framkvæmdina harðlega og hann er ekki sá eini. Auk hans gerðu húsfélög í hverfinu, íbúar og fyrirtæki athugasemdir við byggingu hússins.

Helsta bitbeinið er áætlaður stæðafjöldi í hverfinu. Til stendur að útbúa tuttugu stæði í bílakjallara nýbyggingarinnar en alls verða 96 íbúðir í húsinu. Það gera fimm íbúðir á hvert stæði. Einnig gera íbúar athugasemdir við hæð byggingarinnar og óttast skuggamyndun og áhrif þess á íbúðaverð. „Þetta verður bara eins og bryndreki í hverfinu,“ segir Símon áhyggjufullur.

Símon segir einsýnt að það verði fleiri stúdentar á bílum en borgaryfirvöld áætla. Hann bendir jafnframt á að hótel sé í hverfinu og umferð í kringum það þrengi þegar verulega að íbúum í hverfinu. Það stefni því í ófremdarástand að hans mati. Símon segir íbúa margsinnis hafa komið sjónarmiðum sínum áleiðis, „en hrokinn er bara svo mikill,“ segir hann harðorður í garð borgaryfirvalda.

Hann segir tíma sátta liðinn, nú íhugi hann að taka til sinna ráðstafana. „Ég er að íhuga að fara fram á lögbann vegna framkvæmdarinnar, og skaðabótamál ef af verður,“ segir hann.

Auglýsingastofan Hvíta húsið er einnig í hverfinu. Gísli S. Brynjólfsson, framkvæmdastjóri stofunnar, segir fyrirtækið hafa gagnrýnt áformin. „Hverfið er algjörlega kolsprungið og það fyrir löngu,“ segir hann, en fyrirtækið óttast að engin stæði verði fyrir starfsmenn fyrirtækisins, gangi áformin eftir, hvað þá viðskiptavini.

.

María Rut Kristinsdóttir, formaður Stúdentaráðs, segist ekki vilja gera lítið úr áhyggjum íbúa og fyrirtækja á svæðinu en bendir á að sama tilhögun hafi verið varðandi stúdentaíbúðir á Lindargötunni í miðbæ Reykjavíkur varðandi stæði. Það hafi gefist vel.

„Það er bara þannig að meginþorri stúdenta er ekki á einkabíl,“ útskýrir hún og segir ekki mikla umferð fylgja stúdentum, sem nýti sér frekar almenningssamgöngur og hjól