Látlausir háralitir vinsælir í vetur hjá Aveda

Iðunn Aðalsteinsdóttir, litasérfræðingur og hárgreiðslukona, kynnir haust- og vetrartískuna hjá Aveda, sem einkennist af náttúrlegum jarðlitum.

"Fyrir tveimur árum tók ég Evrópukennararéttindin hjá Aveda og gat því farið að kenna alls staðar í Evrópu. Ég hef eflaust farið á tuttugu námskeið og hef lengi haft þessa löngun til að kenna öðrum og miðla þekkingu. Svo langaði mig að vera eitthvað meira en eingöngu hárgreiðslukona,“ segir Iðunn Aðalsteinsdóttir, sem hefur sérhæft sig sem litafræðingur hjá Aveda á Íslandi.

Iðunn er nýkomin úr vinnuferð frá Berlín, þar sem hún hélt námskeið, og er ferðinni næst heitið til Mílanó. „Ég hef ferðast svo mikið í kringum þetta starf og kynnst ógrynni af spennandi fólki í gegnum Aveda.“

Hárið í vetur

Litirnir hafa fengið ótal verðlaun erlendis en þeir eru 96% náttúrulegir og allt er meira og minna byggt upp á lífrænum blómum og jurtum, jojoba-olíu og lavender. Iðunn byrjaði að læra hárgreiðslu á Unique hár og kynntist Aveda-merkinu þar.

Hún segir að það hafi heillað hana hve gott starf Aveda hefur unnið á alþjóðavettvangi fyrir þjáða en fyrirtækið hafi tekið virkan þátt í að safna fyrir vatnsbrunnum í þorpum á Indlandi, Madagaskar og Afríku.

„Það eru aldeilis ekki allir sem hafa sama aðgengi að vatni og við og því hefur orðið ákveðin vitundarvakning hvað varðar merki sem styrkja lífsgæði fólks með ýmsu sjálfboðastarfi og áheitasöfnunum,“ segir Iðunn og heldur áfram: „Nýja hárlínan frá Aveda er hrá og náttúruleg. 

Heillitir eru að taka yfir og eru litirnir mjög neutral eða með fallegum tónum af bleiku eða brúnu. Það eru einnig allar síddir vinsælar núna nema kannski mjög sítt hár,“ segir Iðunn að lokum.