Ragnhildur Steinunn: Maður krossar í það minnsta fingur

„Það er frábært hvað myndin hefur fengið góð viðbrögð, bæði hér og víðar,“ segir Ragnhildur Steinunn Jónsdóttir fjölmiðlakona. Heimildarmynd hennar, Hrafnhildur, keppir á kvikmyndahátíðinni Nordisk Panorama í lok næsta mánaðar.

Flokkurinn sem mynd Ragnhildar Steinunnar keppir í er ætlaður ungum og upprennandi leikstjórum og kallast New Nordic Voices. Tvær aðrar íslenskar myndir keppa í flokknum: Ástarsaga eftir Ásu Hjörleifsdóttur og The Last Thing eftir Hörpu Fönn Sigurjónsdóttur. Spurð hvort hún sé vongóð um sigur segir Ragnhildur Steinunn hlæjandi: „Maður krossar í það minnsta fingur. Ég held við séum um fimmtán, tuttugu sem keppum í flokknum, þannig að við erum mörg. En það er mikill heiður fyrir ungan og óreyndan leikstjóra að komast inn á hátíðina, hvað þá að komast í keppnisflokk. Maður veit líka að erlendar sjónvarpsstöðvar fylgjast náið með hátíðinni og ég vona bara að myndin fari sem víðast.“

Reynslan frá Rúv nýtist vel

Ragnhildi Steinunni þykir leikstjórnarstarfið áhugavert og myndi gjarnan vilja sinna því enn frekar í framtíðinni. „Mér fannst rosalega gaman að gera Hrafnhildi, þá sérstaklega af því ég gerði hana nánast sjálf frá A til Ö. Þó ég hafi ekkert lært í kvikmyndagerð þá hef ég fengist við mjög ólíka dagskrárgerð á RÚV og sú reynsla nýttist vel í þessu ferli.“

Fjölmiðlakonan á von á sínu öðru barni eftir tvær vikur og hyggst nýta barneignafrí sitt í eftirvinnslu nýrrar heimildarmyndar sem hún vinnur að í samstarfi við Sjónvarpið og Egil Eðvarðsson. „Við náum vonandi að klára að klippa myndina í fæðingarorlofinu. Ég nýti þau í þetta, ég kláraði Hrafnhildi í hinu orlofinu.“

Aðspurð hvort hún ætli að taka þátt í fagnaðarlátunum er fylgja Gleðigöngunni sem fram fer í dag segir hún: „Ég vil gjarnan taka fullan þátt, en það verður að ráðast af samdráttarverkjum hversu mikinn þátt ég tek í hátíðahöldunum í ár,“ segir hún að lokum.