Aftur á Þjóðhátíð

Stuðmenn fagna 30 ára afmæli kvikmyndarinnar Með allt á hreinu á tónleikum á Þjóðhátíð í Eyjum um helgina. Þessi vinsæla bíómynd var einmitt að hluta til kvikmynduð þar.

Stuðmenn eru ekki ókunnugir Þjóðhátíð í Eyjum þar sem þeir tróðu upp fyrr á árum. Nú verður leikurinn endurtekinn en Tómas Tómasson, bassaleikari hljómsveitarinnar, segir að tónleikarnir verði á föstudagskvöldið. „Þeir verða svipaðir og í Hörpu í vetur. Áður fyrr lékum við öll kvöldin í Eyjum en nú verðum við aðeins þetta eina kvöld,“ segir hann.

„Hljómsveitin hafði verið í langri pásu þegar tónleikarnir voru haldnir í Hörpu en nú eru allir í fínu formi og áherslan er á tónlistina úr myndinni Með allt á hreinu,“ segir Tómas.

Það er ljóst að gestir ættu að geta sungið með hljómsveitinni.

Flestir kunna smellina sem einkenndu bíómyndina, eins og Einsa kalda. Tómas segist vonast til að veðrið verði gott um helgina. „Síðast þegar við vorum á Þjóðhátíð rigndi óskaplega en þá spiluðum við á gamla sviðinu. Ég hlakka mikið til að troða upp á nýju og glæsilegu sviði. Þar er miklu betri aðstaða og útsýni fyrir áhorfendur,“ segir Tómas sem segist aldrei hafa farið á Þjóðhátíð til að skemmta sér, aðeins öðrum. „Ég fór einu sinni á útihátíð í Húsafelli. Þá var ég 14 ára og hlustaði á Hljóma. Fljótlega eftir það fór ég að spila um verslunarmannahelgar. Það voru eingöngu vinnuferðir.“



Stuðmenn léku í mörg ár í Atlavík um verslunarmannahelgina. „Þar var alltaf mikill mannfjöldi sem kom alls staðar að af landinu,“ segir Tómas. Margir muna eftir því þegar bítillinn Ringo Starr mætti þangað árið 1984 á vegum hljómsveitarinnar og Tómas minnist þess með gleði. „Það var eiginlega tilviljun að hann var ekkert að gera þessa helgi og gat komist til að spila með okkur.“



Á sunnudaginn mæta Stuðmenn aftur til leiks í Húsdýragarðinum en fimm ár eru síðan þeir héldu tónleika þar síðast. „Tónleikarnir hefjast kl. 20 og eru fyrir alla fjölskylduna. Síðast mættu um tíu þúsund manns,“ segir Tómas sem er tónlistarstjóri hjá barnum Ob-la-dí á Frakkastíg 8. „Við höfum haldið litla þjóðhátíð á þessum bar undanfarin ár en þar eru haldnir tónleikar um hverja helgi. Eigandi staðarins, Davíð Steingrímsson, er mesti aðdáandi Bítlanna fyrr og síðar. Enginn Íslendingur hefur farið oftar á tónleika með Paul McCartney.“