Katy Perry mætti með 92 ára gamalli ömmu sinni

Katy Perry mætti með ömmu sína á frumsýningu Strumpanna 2 á sunnudaginn.

Hin 28 ára gamla Perry og hin 92 ára gamla amma hennar, Ann Hudson, voru glæsilegar á dreglinum sem að þessu sinni var blár í anda Strumpanna.

Söngkonan klæddist fallegum bláum kjól á frumsýningunni en amman mætti í gráum jakka og stuttermabol sem að á stóð „Ég er heit fyrir Æðstastrumpi“.

Perry ljáir Strympu rödd sína í teiknimyndinni, en með önnur hlutverk fara gamanleikarinn Neil Patrick Harris, Brendan Gleeson, Hank Azaria og leikkonan Jayma Mays.

Einnig fara Christina Ricci og spjallþáttastjórnandinn Jimmy Kimmel með hlutverk í teiknimyndinni um litlu, bláu verurnar.