Á persónulegum nótum

Framhaldsskólakennararnir Þorbjörn Sigurbjörnsson og Sigurður Eggertsson eiga alla jafna langt og gott frí á sumrin. Í ár ákváðu þeir að nota það til að koma á fót ferðaþjónustu sem hefur fengið nafnið Iceland Day Trips.

Þeir náðu sér í meiraprófsréttindi, keyptu litla skutlu og rúnta nú með litla hópa ferðamanna í dagstúra og styttri ferðir. Þá bjóða þeir upp á persónulega innkaupaþjónustu eða svokallaðan „personal shopper“ en slík þjónusta getur komið sér vel fyrir ferðamenn sem vilja rata beint í réttu búðirnar og hafa lítinn tíma til stefnu.

Vinaleg stemning

„Hugmyndin er að bjóða upp á persónulega þjónustu. Við viljum vera sveigjanlegir og stoppa þar sem fólk vill. Stemningin á að vera svipuð því og þegar farið er með vinum og fjölskyldu út á land og ætti því að gefa raunsannari mynd af landi og þjóð en gengur og gerist,“ segir Þorbjörn. „Við förum hefðbundna rúnta eins og Gullna hringinn og á Reykjanesið en brjótum þá upp með alls kyns tvisti. Stoppum til að mynda á bóndabæjum, í hellum og við virkjanir. Þá er hægt að óska eftir sérsniðnum ferðum og getum við til að mynda farið með fólk í miðnæturgolf eða boðið upp á leiðsögn um næturlífið í miðbæ Reykjavíkur svo dæmi séu nefnd.“

Vísar veginn

Þorbjörn og Sigurður hafa umsjón með ferðalögunum en fengu barítónsöngvarann og tískuáhugamanninn Árna Georgsson til að sjá um innkaupaþjónustuna. „Hann fylgist gríðarlega vel með tískunni og veit upp á hár hvaða tískustraumar eru ríkjandi hverju sinni. Hann skoðar og pælir og veit hvar allt fæst. Þjónustan virkar þannig að hann setur sig í samband við fólkið og kannar hverjar áherslurnar eru. Hann kynnir sér stíl þess og kannar hvort fólk sé á höttunum eftir íslenskri hönnun, skartgripum eða jafnvel loðfeld og rúntar svo með það á rétta staði,“ útskýrir Þorbjörn. Hann segir marga ferðamenn halda til á Laugaveginum en telur þá fara á mis við alls kyns hliðar- og sérverslanir. „Þar kemur Árni sterkur inn, auk þess sem þjónusta sem þessi hefur reynst þeim sem hafa lítinn tíma en vilja engu að síður gera góð kaup vel.“

Þorbjörn segir þá félaga stefna á að halda starfseminni áfram meðfram kennarastörfum í vetur. „Já, við ætlum í norðurljósaslaginn með hinum og komum til að bjóða upp á bæði kvöld- og helgarferðir.”