Eyjamenn veiða lunda eftir bann í tvö sumur

Meirihlutinn í bæjarstjórn Vestmannaeyja samþykkti í gær að heimila lundaveiðar í fimm daga frá og með deginum í dag. Náttúrustofa Suðurlands mælti gegn veiðunum sem legið hafa niðri í tvö ár vegna lélegrar nýliðunar í lundastofninum.

Lundaveiðar hefjast í Vestmannaeyjum í dag eftir tveggja ára hlé. Bæjarstjórnin samþykkti í gær að veiða megi í fimm daga frá og með deginum í dag. Veiðitímabilið var 55 dagar á árum áður.

Georg Arnarsson, sem veitt hefur lunda í 35 ár, fagnar ákvörðuninni þótt hann segist helst viljað hafa veiðidaga í ágúst líka. Algjör forrréttindi séu að geta setið úti í náttúrunni og háfað sér nokkra fugla í soðið.

„Ég heyri á öðrum veiðmönnum að Eyjamenn eru þegar byrjaðir að hringja og kvabba um hvort þeir geti ekki reddað nokkrum fuglum. Lundinn er ekki bara eign þeirra sem veiða hann og ég hef fyrir mitt leyti sagt við fólk að ég gefi því kannski smakk ef það kemur í tjaldið hjá mér á þjóðhátíð,“ segir Georg.

Harðar umræður urðu um málið á bæjarstjórnarfundinum. Bæjarfulltrúar V-lista kváðust harma ákvörðun meirihluta sjálfstæðismanna. Við Fréttablaðið segist Kristín Jóhannsdóttir, úr V-listanum, treysta mati sérfræðinga Náttúrustofu Suðurlands og margra annarra sérfróðra sem telji viðkomu lundastofnsins of litla til þess að tímabært sé að taka veiðarnar upp. Á bæjarstjórnarfundinum benti hún á að hægt væri að halda í hefðir með því að veiða lundann en merkja hann síðan og sleppa.

Að sögn Kristínar bera þeir sem mæla með veiðunum því að lundaveiðimenn muni taka tilliti til stöðunnar og gæta hófs. „Það á auðvitað við um marga þeirra en ég hef samt áhyggjur að það séu ekki allir jafn ábyrgir. Mér finnst í góðu lagi að menn borði eitthvað annað en lunda á þjóðhátíð,“ segir Kristín.

Eins og bæjarfulltrúar meirihluta Sjálfstæðisflokks er Georg ekki sammála mati Náttúrstofu Suðurlands á stöðu lundastofnsins. Mikið sé af fugli.

„En þó að stofninn sé gríðarlega sterkur er maður uggandi yfir hvernig nýliðunin hefur verið í pysjunni. Ég ætla að skreppa og ná mér í soðið en bara ef ég sé að það er ungfugl og gott flug og ástandið í lagi. Ef það er lélegt ástand þá fer ég ekki í veiði,“ segir Georg Arnarson.