Skógrækt og skátar vilja munka að Úlfljótsvatni

"Við höfum verið í viðræðum við kaþólsku kirkjuna um að fá munkareglu að Úlfljótsvatni sem gæti fengið leigða hjá okkur aðstöðu í íbúðarhúsinu og haft aðgang að kirkjunni," upplýsir Magnús Gunnarsson, formaður Skógræktarfélags Íslands en félagið keypti hálfa jörðina að Úlfljótsvatni í árslok 2011, kirkjuna, íbúðarhús og útihús.

"Þarna er 1.500 hektara land með mikil tækifæri til skógræktar, skógarhöggs og vinnslu úr trjám," segir Magnús sem tekur fram að skátarnir eigi enn ítök á staðnum. "Skátarnir og Skógræktarfélag Íslands standa saman að málum og hafa myndað ákveðið félag um Úlfljótsvatn. Við í skógræktinni erum þá eiginlega bændurnir á svæðinu. Okkar hlutverk er að rækta skóg og gefa almenningi kost á að fara frjáls um þær náttúruperlur sem við tökum í fóstur."



En hvað hyggst Magnús fyrir með munkana?



"Við lítum til Benediktsreglunnar. Þar iðka munkarnir trú sína í átta tíma, vinna í átta tíma og hvíla sig í átta tíma. Munkarnir eru oft og tíðum góðir handverksmenn. Benediktsmunkar brugga til dæmis prýðilegan bjór! Eins og þú heyrir er þetta ekki hugsað til fimm ára, tíu ára eða tuttugu ára, heldur til langs tíma."

Hann segir allt í sambandi við munkana gert í fullri sátt við skátana.

"Það eru viðræður í gangi um málið og ég vona að það endi eins og báðir aðilar leggja upp með, að þetta verði að veruleika."

Upptaktur Úlfljótsvatnshátíðarinnar, sem hefst klukkan 12 á laugardaginn og stendur til klukkan 17 á sunnudag, gæti verið vísbending um það sem koma skal. Þá syngur herra Pétur Bürcher kaþólska messu í kirkjunni.

Síðan rekur hver viðburðurinn annan. Nefna má göngu- og rútuferðir um nágrennið, stutt erindi þar sem sérfræðingar fjalla um fuglalíf, urriða og fornminjar á Úlfljótsvatni, tónleika með lögum og ljóðum sunnlenskra skálda, minningar, sögur og myndasýningu frá ýmsum tímum af fólki á Úlfljótsvatni við leik og störf, að ógleymdri messu frú Agnesar M. Sigurðardóttur, biskups Íslands á hádegi á sunnudeginum.



Sem sagt, fjölþætt dagskrá og hún er í höndum Hollvina Grímsness.