Fjölbrautaskóli tryggi skólavist

Ekki bara þeir nemendur sem skara fram úr eiga að komast í framhaldsskóla, segir bæjarstjórn Garðabæjar.

„Skólayfirvöldum í Garðabæ er umhugað um að hlúð verði að öllum nemendum í bænum en ekki bara þeim sem skara fram úr, heldur líka að hugað sé að þeim nemendum sem af einhverri ástæðu finna sér ekki farveg á framhaldsskólastiginu,“ segir í greinargerð með tillögu sem bæjarstjórnin samþykkti.

Skólaskrifstofu Garðabæjar er þannig falið að kanna fjölda nemenda yngri en átján ára sem lokið hafa námi úr grunnskólum Garðabæjar og ekki eru innritaðir í neina framhaldsskóla á komandi vetri.

„Í samstarfi við Fjölbrautaskólann í Garðabæ verði síðan leitast við að tryggja viðkomandi skólavist í skólanum enda óski viðkomandi nemandi þess,“ segir bæjarstjórnin.