Dæmdur níðingur aftur í haldi fyrir kynferðisbrot

Dæmdur kynferðisbrotamaður situr nú í gæsluvarðhaldi, grunaður um að hafa brotist inn á nokkur heimili í Þingholtum og Kópavogi og í tveimur tilvikum hafi uppi kynferðislega tilburði við unglingsstúlku og unga konu. RÚV greindi frá málinu í kvöld.

Maðurinn, sem er 45 ára, hlaut árið 2009 fjögurra ára fangelsisdóm fyrir að brjótast inn í hús að næturlagi og brjóta kynferðislega gegn fimm ára stúlku. Þá hét hann Jóhann Sigurðarson en að því er fram kom á RÚV í gær hefur hann nú skipt um nafn.

Sakaferill hans nær aftur til ársins 2000. Árið 2004 fékk hann tveggja ára fangelsisdóm fyrir að fara í tvígang inn á heimili í leyfisleysi og nema í annað skipti á brott fjögurra ára stúlku sem svaf í rúmi sínu. Árið áður fékk hann níu mánaða dóm fyrir að ráðast á konu á salerni veitingahúss, berja höfði hennar margsinnis við vegg, draga niður um hana buxurnar og káfa á kynfærum hennar.

Málið nú kom upp þegar húsráðendur hringdu í lögreglu vegna manns sem var kominn inn á heimili þeirra. Kom þá í ljós að sams konar atvik höfðu fimm sinnum átt sér stað annars staðar stuttu áður.