Fasteignamat Hörpu sagt vera fráleitt

Lögmenn Portus annars vegar og Reykjavíkurborgar og Þjóðskrár Íslands hins vegar eru ekki á einu máli um nauðsyn þess að kalla til dómskvadda matmenn til að meta markaðsvirði Hörpu.

Tekist var á um málið í Héraðsdómi Reykjavíkur í gær.

Víðir Smári Petersen, héraðsdómslögmaður, sem flutti málið fyrir hönd Portusar, sagði ljóst að fasteignamat Hörpu upp á 22 milljarða króna væri „fráleitt“.

Viðurkennt væri að fasteignamat ætti að eftir því sem kostur er að endurspegla markaðsvirði fasteigna. Himinn og haf væri á milli virðismats sem Portus hafi fengið PwC og Capacent til þess að vinna, en samkvæmt þeim er markaðsvirðið sex til sjö milljarðar króna.

Vilhjálmur H. Vilhjálmsson lögmaður Reykjavíkurborgar og Einar K. Hallvarðsson lögmaður Þjóðskrár, báru hins vegar að ekkert væri unnið með því að dómskvaddir matsmenn mætu virði Hörpu.

Deilan snerist um það hvort yfirfasteignamatsnefnd hefði farið að lögum þegar hún kvað upp úrskurð sinn um fasteignamat Hörpu. Byggingin væri einstök og ekki hægt að finna út á hana markaðsvirði.

Þannig sagði Einar að jafnvel þótt matsegð sýndi lægra mat þá væri vafi á því að eitthvað mætti úr því lesa um hvort aðferðafræði Þjóðskrár hefði verið röng.

Sagði hann mikla sérstöðu hússin sgera að verkum að „markaðsleiðrétt kostnaðarmat“ sem beitt hafi verið við aðferðina væri rétta leiðin.

Vilhjálmur H. Vilhjálmsson, áréttaði einnig að matsaðferðin væri undir í málinu. „Stenst aðferðin fyrir dómi að stenst hún ekki? Það er erfitt að sjá hver er þýðing matsbeiðni og matsgerðar í þessu máli,“ sagði hann fyrir dómi í gær.

Víðir Smári vísaði hins vegar einnig til þess að heimildir málsaðila í einkamálum til að kalla til matsmenn væru mjög ríkar og vísaði í fjölda mála því til stuðnings. Fráleitt væri að styðjast í jafnmiklu mæli og gert hafi verið við byggingakostnað Hörpu, sem hafi enda aukist mjög vegna hrunsins.

Upphaflega var gert ráð fyrir að húsið ætti að kosta 12 milljarða, en endanlegur kostnaður var nær 28 milljörðum króna.

„Það er ósanngjarnt að miða við byggingarkostnað sem endurspegar ekki raunverulegt virði byggingarinnar,“ sagði Víðir Smári fyrir dómi. Þá benti hann á að stefnandi sjálfur bæri af því hallann ef niðurstaða matsins leiddi ekki til neins.

Til nokkurs er að vinna fyrir Portus að fá fasteignagjöldin lækkuð, en gjöldin fyrir 2012 námu 340 milljónum króna.