Öskjuhlíðin nýtt sem Sorpa

Umgengni í Öskjuhlíð hefur lengi verið vandamál en lítið hefur verið gert til þess að sporna við slæmri framkomu borgarbúa við þessa skógi vöxnu paradís.

Lesandi Fréttablaðsins hafði samband og sagðist hafa verið að gera léttar æfingar þegar hann gekk fram á sorp úr görðum ­borgarinnar, sófasett og dauða kanínu sem hékk í trjágrein svo fátt eitt sé nefnt.

Friðjón Örn, leiðbeinandi í unglingavinnunni sem hefur hafið sitt annað sumar sem leiðbeinandi á svæðinu, segir þetta ekki óalgengt, því miður. „Borgarbúar líta á Öskjuhlíðina sem Sorpu. Fólk kemur hingað og hendir garðúrgangi og almennu rusli úr görðunum sínum,“ segir Friðjón.

Hann segist þó ekki aðeins verða var við úrgang úr görðum. „Við fundum sófasett inni í skóginum. Ég hef fundið þvotta­grindur og ofna og alls kyns dót. Það er alls staðar rusl, til dæmis verjur. Ég hef verið heppinn að finna ekki sprautur nú í sumar. Það var mjög algengt í fyrrasumar.“

Friðjón segir að sögurnar sem fara af hinum ýmsu atburðum í hlíðinni séu ekki ýktar. ,,Þetta eru ekki flökkusögur, vertu hér í viku frá 8 til 18 og þá sérðu ýmislegt,“ segir Friðjón.

Hver þremillinn! Sendið okkur myndir og upplýsingar um sóðaskap, hirðuleysi, slysagildrur og fleira. thremillinn@frettabladid.is