Hver þremillinn! Ruslahaugur verður til í Árbæjarhverfi

Mikið af rusli hefur safnast fyrir í miðju íbúðahverfi í Árbænum. Bílhlöss af steypurusli, mótatimbur, fiskikar, þvottavél, bíldekk og bílþak eru í haugnum.

Starfsmenn Reykjavíkurborgar voru mættir í Árbæinn í gær til að sinna hreinsunarstörfum, eftir að Fréttablaðið hringdi í borgina til að grennslast fyrir um rusl sem þar hefur safnast fyrir. Þeim varð þó lítið ágengt enda ljóst að verkefnið er stórt.

Svo virðist vera að byggingaverktakar við Ferjuvað hafi hent miklu magni af steypustyrktarjárni, bútum af veggjum, timbri og öðru rusli yfir á nærliggjandi lóð. Aðrir hafi svo fylgt í kjölfarið og losað meiri úrgang á svæðinu. Nú er svo komið að líkja má lóðinni við lítinn ruslahaug.

Erfitt reyndist að finna hver ber ábyrgð á málinu innan borgarkerfisins, en þar benti hver á annan. Ef ruslið er á eignarlóð tilheyrir málið byggingafulltrúa Reykjavíkur sem er Björn Stefán Hallson.

Björn segist strax ætla að skoða málið. „Ég sendi einhvern þangað á morgun til að kanna þetta," segir hann.

Björn bendir á að ef um eignarlóð sé að ræða verði ábyrgðarmanni sent bréf og honum gert að bæta úr ástandinu. Í framhaldi sé síðan jafnvel hægt að beita dagsektum og jafnvel lögtöku á eigninni ef ekkert verði að gert.

katrin@frettabladid.is



Hver þremillinn! Sendið okkur myndir og upplýsingar um sóðaskap, hirðuleysi, slysagildrur og fleira á netfangið thremillinn@frettabladid.is