Eru fegurðarsamkeppnir réttmætar?

Fegurðarsamkeppnin Ungfrú Ísland verður endurvakin í ár. Skiptar skoðanir eru um réttmæti slíkrar keppni og fólk er almennt klofið í afstöðu sinnar til hennar. Er þetta úrrelt fyrirbæri sem snýst eingöngu um útlitsdýrkun eða einstakt tækifæri?  

Katrín Oddsdóttir lögfræðingur og Heiðar snyrtir hafa til að mynda ólíkar skoðanir á fegurðarsamkeppnum.

Hluti af útlitsdýrkun

Katrín Oddsdóttir mannréttindalögfræðingur segir „Ég er fegurðardrottning og ég brosi í gegnum tárin. Tárin grundvallast mögulega á geðshræringu vegna sigurs eða vegna vannæringar, ofurálags, streitu og kvíða yfir því að ég standi á sundbol fyrir framan fjölda manns sem leggur á mig mat eins og nautgrip út frá útliti mínu,“ segir Katrín Oddsdóttir, sem sjálf hefur sótt um þátttöku í keppninni umdeildu. „Ég tel að fegurðarsamkeppnir séu úrelt fyrirbæri og hluti af útlitsdýrkandi áherslum sem valdi konum oft sársauka og misrétti. Þrátt fyrir þessi orð mín tel ég þá sem dæma þátttakendur sem vitlausa hafa rangt fyrir sér,“ segir Katrín jafnframt. 

Tækifæri og ferðalög

Heiðar Jónsson snyrtir er fullviss um réttmæti fegurðarsamkeppna. Hann segir tækifæri sem opnist fyrir vinningshöfum gífurleg. „Ég get nefnt mörg dæmi þess að stelpur hljóti tækifæri eftir að sigra og taka þátt í svona keppnum. Þetta fá ekki allir að upplifa.“ Heiðar segir jafnframt að það sé skiljanlegt að stúlkur sem hafi óraunhæfar hugmyndir um útlit sitt verði fyrir vonbrigðum í slíkum keppnum. „Þetta er ekki fyrir alla auðvitað. Ég er jafnréttissinni, en mér finnst við ekki mega verða algjörlega kynlaus. Það er í lagi að girnast annað fólk. Það finnst mér allavega,“ segir Heiðar kíminn.