Sérstöku veiðigjaldi breytt

Ný ríkisstjórn stefnir að því að breyta lögum um sérstakt veiðigjald strax á sumarþingi. Stefnt er að bráðabirgðabreytingum til eins árs en innheimta sérstaka veiðigjaldsins hefur verið í uppnámi þar sem nauðsynleg gögn til að reikna gjaldið skortir. Sigurður Ingi Jóhannsson sjávarútvegsráðherra segir að stefnt sé að því að leggja fram frumvarp strax í næstu viku. Hann segist þó ekki geta fjallað nákvæmlega um innihaldið enda hafi frumvarpið ekki verið afgreitt úr ríkisstjórn né farið fyrir þingflokka.

„Lögin sem eiga að taka gildi 1. september eru óframkvæmanleg. Við erum hins vegar ekki tilbúin með nýja aðferðarfræði. Það þýðir að til þess að hægt sé að leggja á eitthvert sérstakt veiðigjald þarf að fara bráðabirgðaákvæðisleið til eins árs. Þannig taka eldri lögin aldrei gildi þar sem bráðabirgðaákvæði mun gilda fyrst um sinn og svo reiknum við með því að ný lög taki við þegar bráðabirgðaákvæðinu sleppir,“ segir Sigurður Ingi.

Alþingi samþykkti lög um sérstakt veiðigjald í lok júní 2012 en auk þess leggur ríkið á annað og talsvert lægra almennt veiðigjald. Kveða lögin um sérstaka veiðigjaldið á um að útgerðir greiði ákveðið hlutfall af framlegð í gjald en fyrsta árið var þó ákveðið að byggja gjaldtökuna á bráðabirgðaúrræði þess efnis að veiðigjaldið sé föst krónutala á hvert þorskígildiskíló. Samkvæmt núgildandi lögum á hlutfallsveiðigjaldið að gilda frá næsta fiskveiðiári, sem hefst 1. september, en sú innheimta er í uppnámi þar sem veiðigjaldsnefnd skortir gögn til þess að reikna út nákvæmt gjald.

Sigurður Ingi segist reikna með því að bráðabirgðagjaldtakan verði í formi fastrar krónutölu á þorskígildiskíló en getur þó ekki fjallað um útfærsluna í smáatriðum. Þá sagðist hann heldur ekki geta sagt til um hvort sérstaka veiðigjaldið verði lægra en á yfirstandandi fiskveiðiári. Loks segir Sigurður Ingi að þegar komi að varanlegri endurskoðun sérstaka veiðigjaldsins þurfi að leita leiða til að sjávarútvegurinn geti staðið undir sérstakri gjaldtöku.

„Við vitum að álagningin á þessu ári hefur haft mikil áhrif á sjávarútveginn og þá sérstaklega á minni og meðalstór fyrirtæki. Við viljum að ríkissjóður fái tekjur en greinin þarf líka að geta eflst,“ segir Sigurður. Áætlað hefur verið að tekjur ríkissjóðs af veiðigjöldum verði 12,5 til 13 milljarðar króna á yfirstandandi fiskveiðiári og um 15 milljarðar á því næsta. Samkvæmt veiðigjaldalögunum á gjaldið þar að auki að hækka nokkuð á hverju ári til fiskveiðiársins 2016 til 2017.