Unglingsstúlkur eru fórnarlömb spjallsíðu

Talsvert magn nektarmynda af ungum íslenskum stúlkum er nú í umferð á vefsíðu, að þeim forspurðum. Yngstu stúlkurnar á myndunum eru 13 ára. Sömu netsíðu var lokað af lögreglu fyrir um ári.

Á vefsíðunni dreifa notendur á milli sín nektarmyndum sem þeim hafa áskotnast af stúlkunum.

„Í sumum tilfellum gefa stúlkurnar einhverjum sem þær treysta, kærasta eða bólfélaga, leyfi fyrir myndunum. Ef flosnar upp úr samskiptunum getur þetta orðið að hárbeittu vopni og myndirnar notaðar gegn þeim,“ segir Guðrún Jónsdóttir, framkvæmdastýra Stígamóta. Kynferðisbrotadeild lögreglunnar hefur fengið tugi athugasemda frá áhyggjufullum stúlkum og forráðamönnum þeirra.

„Síðan hefur verið í rannsókn og við erum að vinna í því að fá henni lokað,“ segir Björgvin Björgvinsson, yfirmaður kynferðisbrotadeildar lögreglu.

Samkvæmt upplýsingum Fréttablaðsins er vefsíðan vistuð í Bandaríkjunum sem gerir lögreglu erfiðara um vik. „Við höfum sent beiðni til yfirvalda vestra og bíðum svara um hvort hægt sé að loka sérstaklega fyrir aðgang íslenskra IP-talna á síðuna,“ segir Björgvin.

Myndirnar sem um ræðir eru flestar af stúlkum á aldrinum 15 til 18 ára. Þó eru þar einnig myndir af yngri stúlkum. „Við þekkjum dæmi um að kynferðislegt myndefni af konum hafi verið misnotað herfilega með þessum hætti. Manni finnst dapurlegt og alls ekki viðunandi ef stjórnvöld eru hálfbjargarlaus gagnvart þessu. Við getum ekki sæst á að netið sé óhöndlanlegt,“ segir Guðrún.

Hún segir jafnframt að slíkar myndbirtingar geti haft mikil áhrif á sálarlíf kvennanna. „Konurnar geta fundið fyrir mikilli vanmáttarkennd þar sem þær geta aldrei verið vissar um að myndirnar dúkki ekki einhvers staðar upp aftur. Við styðjum konur í að vinna úr þessu en það getur verið misjafnt hvernig konur takast á við þetta,“ segir Guðrún. 

Stúlkurnar sem Fréttablaðið ræddi við var öllum mjög brugðið. Ein þeirra hafði ekki vitneskju um veru sína þar. „Þetta er bara hræðilegt. Ég veit ekki hvernig er hægt að gera svona lagað. Þetta er sjúkt,“ sagði stúlkan. Hún sagðist jafnframt myndu leita réttar síns.

„Ég held að besta forvörnin sé að fara gætilega og setja ekki nektarmyndir af sér á netið. Þær geta lent í höndunum á hverjum sem er,“ segir Björgvin.