Efnileg vöðvabúnt

Hasarmyndin Fast and Furious 6 var frumsýnd í gær. Kvikmyndin skartar Vin Diesel og Dwayne Johnson í aðalhlutverkum. Vöðvabúntin eru bæði afar hæfileikaríkir menn og vita fáir að Johnson er með BA-gráðu í lífeðlisfræði. Fréttablaðið tók saman nokkra fróðleiksmola um þessa fræknu kappa.

Vin Diesel

Mark Sinclair Vincent fæddist 18. júlí árið 1967 í New York.

Diesel er sonur Deloru stjörnuspekings, en hefur aldrei hitt blóðföður sinn. Stjúpfaðir Diesels, Irving, er af afrískum uppruna og er leikhússtjóri.

Diesel á tvíburabróður, Paul, yngri bróður, Tim, og eina systur, Samönthu.

Diesel lék fyrsta hlutverk sitt aðeins sjö ára gamall í uppfærslu barnaleikritsins Dinosaur Door.

Hann tók upp nafnið Vin Diesel þegar hann starfaði sem dyravörður á skemmtistaðnum Tunnel í New York. Vin er stytting á eftirnafni hans og Diesel er gælunafn sem vinir leikarans kölluðu hann.

Fyrsta kvikmyndahlutverk Diesels var lítið aukahlutverk í kvikmyndinni Awakenings frá árinu 1990. z Leikarinn segist hafa farið í mútur 15 ára gamall og hefur verið einstaklega dimmraddaður allar götur síðan.

Árið 2001 átti Diesel í stuttu sambandi við mótleikkonu sína í The Fast and the Furious, Michelle Rodriguez.

Diesel á dótturina Hania Riley, sem er fimm ára gömul, með kærustu sinni, fyrirsætunni Palomu Jimenez.

Helsta áhugamál Diesels er borðspilið Dungeons & Dragons, sem hann hefur spilað reglulega í yfir 20 ár.

Dwayne Johnson

Dwayne Douglas Johnson fæddist 2. maí árið 1972 í Kaliforníu.

Hann er sonur Ata Johnson, fædd Maivia, og glímumannsins Rocky Johnson. Móðurafi hans, Samóa-höfðinginn Peter Maivia, var einnig glímumaður og var móðuramma hans, Lia Maivia, einn af fáum kvenkyns glímumótshöldurum. Frændur hans, Afa og Sika Anoa‘i, voru einnig glímumenn, sem og frændsystkini hans Manu, Yokozuna, Rikishi, Rosey og Umaga.

Johnson lék bandarískan ruðning í menntaskóla en sneri sér svo alfarið að glímu. Hann varð fyrsti glímumaðurinn af þriðju kynslóð glímumanna hjá WWF. Hann gekk fyrst undir nafninu Rocky Maivia sem síðar varð einfaldlega The Rock, eða Grjótið.

Johnson hefur unnið 17 titla í glímuíþróttinni.

Vinsældir Johnsons innan WWF má meðal annars rekja til mælsku hans og persónutöfra.

Johnson útskrifaðist með BA-gráðu frá Háskólanum í Miami árið 1995. Þar lagði hann stund á afbrota- og lífeðlisfræði.

Árið 2000 kom bókin The Rock Says… út. Bókin er sjálfsævisaga Johnsons og sat efst á metsölulista The New York Times vikuna sem hún kom út.

Fyrsta kvikmyndahlutverk Johnsons var í kvikmyndinni Longshot sem kom út árið 2000.

Fyrsta alvöruhlutverk hans var þó sem The Scorpion King í kvikmyndinni The Mummy Returns.

Johnson giftist Dany Garcia þann 3. maí árið 1997, degi eftir að hann hélt upp á 25 ára afmæli sitt. Dóttir þeirra, Simone Alexandra, fæddist í ágúst árið 2001. Hjónin skildu árið 2007 en eru ennþá mjög náin.