Réðu til sín höfund Beavis and Butthead

„Það er gott að hafa gaur með okkur sem er með áratugareynslu í þessu,“ segir Ágúst Freyr Kristinsson, annar af hugmyndasmiðum teiknimyndaþáttanna Space Stallions sem eru í undirbúningi.

Bandaríkjamaðurinn Andy Rheingold, sem hefur samið handritið að fjölda Beavis and Butthead-þátta og unnið við þróun teiknimyndanna Svampur Sveinsson fyrir sjónvarpsstöðina Nickelodeon, hefur verið ráðinn til að hjálpa Ágústi Frey og Þorvaldi Gunnarssyni með handritið að Space Stallions.

„Við Þorvaldur erum aðallega teiknigaurar og handritsgerð er ekki okkar sterkasta hlið. En við erum búnir að koma þessu mjög langt á veg,“ segir Ágúst Freyr.

Hann og Þorvaldur gerðu á sínum tíma samning við íslenska framleiðslufyrirtækið GunHil. Eins og Fréttablaðið hefur áður greint frá landaði það samningi við breska fyrirtækið Cake Distribution, auk þess sem markaðsfyrirtækið Fuel hefur bæst í hópinn. Í gegnum þau náðust samningar við Rheingold.

„Þetta er allt klíkuskapur þegar þetta er komið á svona stórt „level“. Það þekkjast allir á einhvern hátt. Bara með því að tengjast þessum stóru fyrirtækjum erum við að komast í góð sambönd,“ segir hann.

Búast má við að ferlið við að koma Space Stallions að í sjónvarpi taki nokkur ár og kosti mikið fé. Strákarnir hafa þegar fengið þróunarstyrk frá Evrópusambandinu upp á um tíu milljónir króna.

Í fyrra kynntu þeir teiknimyndina á Cartoon Forum í Toulouse og fengu mjög góð viðbrögð. „Þá var þetta á frekar hráu stigi en eftir sumarið verðum við búnir að vinna þetta betur.“ 

Í haust ætla Ágúst Freyr og Þorvaldur á sölurúnt um Bandaríkin en draumurinn er að koma Space Stallions að á þarlendum sjónvarpsstöðvum. „Þetta er allt eða ekkert-verkefni. Við viljum vera þar með þáttaröð.“

Söguþráður Space Stallions

Nafn seríunnar útleggst sem Geimfolarnir á íslensku og fjallar um hóp sem heldur út í geim til að bjarga alheiminum. 

Þættirnir eru í anda níunda áratugarins og eru ætlaðir fullorðnum. Þeir eru í raun skopstæling á teiknimyndum á borð við ThunderCats og He-Man en samt takast þeir á við nútímavandamál með nútímahúmor.