Hefur ekki áhyggjur af kuldatíðinni

„Það þarf nú ekki að hafa neinar stóráhyggjur af þessu,“ segir Vilmundur Hansen garðyrkjufræðingur, spurður um áhrif kuldatíðarinnar undanfarið á garðyrkjuna.

„Þetta virðist vera rysjótt ár eftir ár en ég sé ekki annað en að blómgun hafi verið ágæt undanfarin ár,“ segir Vilmundur. „Það eina sem gæti gerst er að blómavísar á ávaxta- og berjatrjám hafi skemmst í frosti og það gæti dregið úr berja- og aldinmyndun. Að öðru leyti er þetta bara eins og hvert annað ár.“

Um þetta leyti árs eru margir búnir að forsá jurtum innanhúss en Vilmundur segir að enn sé allt of snemmt að færa þær út. „Það þýðir ekkert að fara af stað með slíkt fyrr en í fyrsta lagi eftir að hættan á næturfrosti er liðin hjá. Ég held að það verði ekki fyrr en 20. maí, eða jafnvel seinna. Það er allt of snemmt núna.“

Veðurspá fram yfir helgi gerir ráð fyrir nokkrum kulda, slyddu og jafnvel éljum víða um land. Vilmundur segir mat- og kryddjurtarækt hafa aukist mikið hér á landi undanfarin ár. Jafnvel sé hægt að tala um sprengingu í þeim efnum.

„Svo er fólk líka orðið frakkara við að prófa nýjar tegundir. Það eru bæði klassískar tegundir eins og kartöflur og grænkál sem allir geta ræktað, en svo er fólk farið að prófa ýmislegt, til dæmis rósakál og fleiri salattegundir og kryddjurtir. Svo hef ég líka verið að fá spurningar um hvítlauk og spergil, þannig að það er eitt og annað sem fólk er að spá í.“ Vilmundur segir fátt því til fyrirstöðu að þessar jurtir þrífist hér á landi.

„Já, með alúð ætti þetta allt saman að vera hægt. Ég hef annars sagt að svona ræktun misheppnist kannski fyrstu tvö árin en svo er maður orðinn góður!“