Tónverk eftir börn og ungmenni frumflutt

Upptakturinn, tónsköpunarverðlaun barna og ungmenna, fór fram í Hörpunni á þriðjudag. Þar fluttu atvinnuhljóðfæraleikarar þrettán tónverk eftir börn og ungmenni. Upptakturinn er samstarfsverkefni Hörpu og Barnamenningarhátíðar í Reykjavík.

Alls voru 59 tónverk send inn þetta árið og voru þrettán verk valin til frekari vinnslu með tónskáldunum Tryggva M. Baldvinssyni og Hafdísi Bjarnadóttur. „Tónskáldin komu verkunum í rétt form fyrir tónlistarfólkið og unnu þetta í samstarfi við krakkana. Atvinnufólk flutti síðan verkin í Hörpu á þriðjudag og börnin sátu í salnum og hlustuðu á eigin tónverk,“ segir Elfa Lilja Gísladóttir, tónlistarkennari og verkefnastjóri Upptakts.