Taka upp plötu í Vestmannaeyjum

„Þeir komu hingað í gær og ætla að vera næstu fimm daga við upptökur,“ segir Árni Óli Ólafsson, eigandi upptökuversins Island Studios í Vestmannaeyjum. Breska sveitin Dry the River er þar að taka upp efni á nýja plötu.

Sveitin hefur verið starfrækt síðustu fjögur ár og verið vinsæl í heimlandinu sem og á meginlandi Evrópu. Fyrri plata þeirra, Shallow Bed, kom út í fyrra og í kjölfarið var Dry the River á sæti BBC yfir tónlist ársins 2012. Sveitina skipa þeir Peter Liddle, Matthew Taylor, Scott Miller, Jon Warren og Will Harvey. Gagnrýnandi Guardian líkir sveitinni við Mumford & Sons með hljóm sínum.

„Þeir eru hérna tveir úr sveitinni ásamt upptökustjóra og myndatökumanni og eru að taka upp sönginn á næstu plötu sinni. Þeir hafa verið eitthvað að ferðast um landið áður þeir komu hingað að vinna,“ segir Árni Óli og bætir við að þeir hafi bókað tímann í stúdíóinu fyrir nokkru síðan. Island Studios var stofnað árið 2007 og segir Árni þetta ekki í fyrsta sinn sem þeir fái erlendar sveitir til sín. „Sveitir sækja í að koma hingað til að taka upp í friði og ró en við bjóðum upp á fyrsta flokks aðstöðu hérna.“ -áp