Þarf að horfa til allra eigna við afnám gjaldeyrishafta

Þverpólitísk nefnd um afnám gjaldeyrishafta segir nauðsynlegt að horfa heildrænt á erlendar eignir hérlendis við afnám haftanna. Lausnir á afmörkuðum vanda, svo sem krónueignum eða sölu banka, geti seinkað afnámi haftanna og jafnvel ógnað fjármála- og gengisstöðugleika.

Þetta kemur fram í bréfi sem nefndin ritaði fjármála- og efnahagsráðherra og formönnum stjórnmálaflokka. Fréttablaðið ræddi við nefndarmenn, en nefndin var skipuð fulltrúum allra þingflokka.

Jón Helgi Egilsson, fulltrúi Hreyfingarinnar, segir að stjórnmálaflokkarnir verði að geta svarað því hvernig leysa eigi það vandamál, sem innlendar eignir erlenda kröfuhafa eru, í heild sinni. Um gríðarlegar upphæðir sé að ræða, eða 2.700 milljarða. Hann varar við umræðu um einstakar aðgerðir, svo sem sölu bankanna.

„Það vantar alveg að setja stóru myndina niður. Innlendar krónueignir erlendra aðila geta haft veruleg áhrif á gengið til framtíðar.“

Huginn Freyr Þorsteinsson, fulltrúi Vinstri grænna, tekur undir það og segir að ekki megi búa til ímyndaða tímapressu. „Mikið hvílir á því að afnám gjaldeyrishafta takist vel. Ef ekki þá myndi hvaða skuldaleiðrétting sem er duga skammt gagnvart því vandamáli sem myndi þá blasa við í íslensku efnahagslífi.“

Tryggvi Þór Herbertsson, fulltrúi Sjálfstæðisflokksins, segir það geta skert samningsstöðu Íslands verði farið út í einhverjar sértækar aðgerðir. „Við leggjum gríðarlega mikla áherslu á að þetta verði allt saman gert í samstöðu allra stjórnmálaflokka og það verði gert á trúverðugan hátt.“

Bolli Héðinsson, fulltrúi Samfylkingarinnar, segir erfitt ef búið er að ráðstafa þeim eignum sem talið sé að liggi í fjármununum. „Ef menn eru búnir að lofa mjög miklu þá vita kröfuhafarnir sem er að þú þarft að fara að afhenda til kjósenda og þá er hættara við því að þú sért að einhverju leyti búinn að gera þér verri samningsstöðu en þú þyrftir að vera í.“