Upplýsingar handa öllum

„Málið sem hér er á ferðinni er gríðarlega stórt, þótt það láti kannski ekki mikið yfir sér,“ segir Katrín Júlíusdóttir, fjármála- og efnahagsráðherra. Hún, ásamt Finni Pálma Magnússyni, formanni starfshóps um opin gögn og birtingu fjárhagsupplýsinga ríkisins, kynnti í gær á blaðamannafundi fyrstu skrefin í átt að því að gera upplýsingar úr bókhaldi ríkisins aðgengilegar almenningi.

Tekin hefur verði ákvörðun um að gögn frá Fjársýslu ríkisins sem fram til þess hafa komið fyrir sjónir fárra verði hér eftir birt og uppfærð á nýju vefsvæði sem nota á til framtíðar fyrir opin gögn hins opinbera, gogn.island.is.

Katrín segir markmið verkefnisins að stuðla að greiðum aðgangi almennings að fjárhagsupplýsingum ríkisins. „Gegnsæi er lykilatriði í þessari vinnu og samfara því aukið aðhald og traust í samfélaginu,“ segir hún. Málið sé eitt af hennar uppáhaldsviðfangsefnum í ráðuneytinu. „Mér finnst þessar upplýsingar þess eðlis að þær eigi að vera öllum aðgengilegar, þannig að fjölmiðlar og aðrir sem oft hafa hringt í ráðuneyti í leit að upplýsingum um einstaka liði fjárlaga eða í rekstri hins opinbera geti séð þetta sjálfir og sett fram á þann máta sem þeir telja bestan.“

Gögnin sem nú hafa verið birt varða árshluta- og mánaðaruppgjör ríkissjóðs og eru ítarlegri og aðgengilegri en hingað til. Þær geta nýst almenningi, fyrirtækjum í upplýsingatækni og fjölmiðlum.

Í gær var um leið birt skýrsla starfshóps forsætisráðherra og fjármála- og efnahagsráðherra, sem unnið hefur að því undanfarna mánuði að birta með aðgengilegum hætti fjárhagsupplýsingar ríkisins. Í skýrslu starfshópsins eru meðal annars lögð til næstu skref í birtingu fjárhagsupplýsinga og kynntir leyfisskilmálar fyrir gögnin sem eru að breskri fyrirmynd. Samkvæmt skilmálunum má hver sem er nota gögnin eins og honum sýnist.

Katrín segir að í framhaldinu bætist við gögnin á vefnum, bæði frá öðrum stofnunum ríkisins og eins frá sveitarfélögum. Hún ætli að leggja sig fram um að tryggja að verkefnið haldi áfram eftir kosningar og því kunni að vera ráðlegt að láta starfshópinn starfa áfram inn í næsta kjörtímabil.