Býður upp á að menn fresti málum út í hið óendanlega

Sérstakur saksóknari telur að sú ákvörðun Gests Jónssonar og Ragnars H. Hall, verjenda í Al Thani-málinu svokallaða, að mæta ekki í réttinn í dag gæti kallað á breytingar á sakamálalögum. Annars sé búið að opna sakborningum leið til þess að fresta málum sínum út í hið óendanlega.

Ólafur tekur fram að enn eigi eftir að koma í ljós hvort verjendurnir standi við yfirlýsingar sínar og láti ekki sjá sig í dómsalnum. Ragnar hefur lýst því afdráttarlaust yfir og Gestur staðfesti það í samtali við Fréttablaðið í gær. „Við munum hvorugur mæta,“ sagði Gestur.

Allir sem Fréttablaðið hefur rætt við eru sammála um að dómari eigi þá varla annarra kosta völ en að fresta aðalmeðferðinni, sem átti að hefjast í dag, og gefa nýjum verjendum tækifæri til að setja sig inn í málið. Til þess hafa Gestur og Ragnar haft um fjögur ár, frá því að rannsókn hófst.

Verði það raunin er óvíst hversu lengi málinu verður frestað, en jafnvel er talið hugsanlegt að það verði fram yfir sumarfrí dómstólanna, sem sagt fram á næsta haust.

Ákvörðun verjendanna er án fordæma. „Þeir sögðu sjálfir að þetta væri fáheyrt og við teljum að það standist einfaldlega ekki að þetta sé hægt. Þetta á ekki að gerast,“ segir Ólafur Þór Hauksson, sérstakur saksóknari.

Aðspurður samsinnir hann því að verði málinu frestað, eins og allt stefnir í, bjóði það upp á að verjendur sakborninga, og svo eftirmenn þeirra, segi sig ítrekað frá sama málinu til að fá því frestað, þess vegna að eilífu.

„Þá er búið að gefa ákveðinn tón og gæti leitt til þess að menn þyrftu að breyta lögum til að girða fyrir þetta,“ segir Ólafur Þór Hauksson.