Teljum uppsögnina ólögmæta

Ekki sér enn fyrir endann á máli landsliðsmannsins Kára Kristjáns Kristjánssonar og Wetzlar, félagsliðs hans í Þýskalandi. Kári lét á það reyna í gær að mæta á æfingu eins og hann átti upphaflega að gera en Björn Seipp, framkvæmdastjóri félagsins, vísaði honum frá. Kári vildi ekki tjá sig um málið við Fréttablaðið en vísaði á lögfræðing sinn, Stephen Pfeiffer.

Forsaga málsins er sú að Kári Kristján lék með íslenska landsliðinu gegn Slóveníu ytra í síðustu viku. Ísland vann leikinn og spilaði Kári stórt hlutverk á lokamínútunum, er Ísland tryggði sér sigur.

Sakaði Kára um blekkingar

Daginn eftir leikinn bárust fregnir af því í gegnum þýska fjölmiðla að Kára Kristjáni hefði verið sagt upp hjá Wetzlar, þar sem hann hefði gerst sekur um samningsbrot. Kári hefði verið skráður á sjúkralista félagsins til 4. apríl og mætti samkvæmt læknisráði ekki keppa fyrr en í fyrsta lagi 2-3 vikum síðar.

HSÍ og Kári svöruðu með yfirlýsingu um að leikmaðurinn hefði fengið leyfi frá tveimur læknum Wetzlar til að taka sig af sjúkralistanum, svo hann gæti spilað með íslenska landsliðinu. Seipp segir það ósatt og sakaði í fyrradag Kára um að hafa blekkt sig, þjálfara og lækna félagsins. Þetta gerði hann í langri yfirlýsingu sem birtist á heimasíðu félagsins en Seipp gekk mjög hart fram og staðhæfði til að mynda að Kári hefði stofnað lífi sínu í hættu með því að spila umræddan landsleik.

Viljum finna lausn á málinu

Pfeiffer sagði í samtali við Fréttablaðið í gær að málið væri enn á viðkvæmu stigi. „Við göngum út frá því að um misskilning hafi verið að ræða. Við teljum enn fremur að uppsögnin muni ekki standast lög og sé því ógild," segir Pfeiffer og sagðist ekki vilja veita frekari upplýsingar um næstu skref í málinu að svo stöddu.

„Við vonum fyrst og fremst að hægt verði að finna lausn á þessu máli sem verði bæði íþróttinni og Kára sjálfum til heilla. Ef þetta verður að dómsmáli munum við skýra frá málstað okkar í dómsalnum," segir Pfeiffer.

Kári Kristján var samningsbundinn Wetzlar til loka þessa tímabils en fyrr í vetur gekk hann frá samningi við danska liðið Bjerringbro/Silkeborg og mun hann halda til Danmerkur í sumar.

Hann hefur ekkert spilað með Wetzlar síðan í febrúar en þá gekkst hann undir aðgerð á baki þar sem góðkynja æxli var fjarlægt.

Sportið á Vísi er á Facebook. Fylgstu með.