Kári: Ég fékk skýrt já

Kári Kristján Kristjánsson segist hafa fengið skýr svö frá tveimur læknum hjá Wetzlar um að hann mætti spila með íslenska landsliðinu í Slóveníu.

Kára var sagt upp störfum í gær eftir að hann spilaði með íslenska landsliðinu gegn Slóveníu á miðvikudaginn.

Þegar Kári lenti á Keflavíkurflugvelli í gær fékk hann að vita að það hefði verið gert opinbert í fjölmiðlum.

„Það kom mér algjörlega í opna skjöldu. Annars væri ég ekki að segja mína hlið á þessu máli," sagði hann við Vísi í dag.

Kári var skráður á sjúkralista Wetzlar til 4. apríl. Hann kom til móts við landsliðið um síðustu helgi og læknar landsliðsins mátu þá að hann væri leikfær. Kári hafði því samband við lækna Wetzlar og báðu um að skrifa hann leikfæran frá og með 2. apríl.

„Vinnureglan í þessum málum er að maður þarf að sinna tilkynningaskyldu og ég gerði það. Ég hafði samband við báða læknana hjá Wetzlar og þeir gáfu mér skýrt „já"," segir Kári.

Miðað við viðbrögð forráðamanna Wetzlar hafa þeir allt aðra sögu að segja. Þeir segjast ekki hafa gert ráð fyrir Kára fyrr en í maí og að hann hafi aðeins fengið leyfi til að fara til Íslands til að fá meðhöndlum hjá læknum landsliðsins. Það hafi svo komið þeim algjörlega í opna skjöldu að sjá hann spila í Slóveníu.

Staðan virðist því orðin þannig að orð standi gegn orði.

„Því miður er það þannig og ég veit ekki hvernig þetta fer allt saman. Nú erum við að kanna okkar stöðu með lögfræðingum í Þýskalandi."