Telur Umferðarstofu gera óhóflegar kröfur

Óhóflegar kröfur Umferðarstofu torvelda einyrkjum á sviði bifvélavirkjunar að öðlast réttindi til að setja metanbúnað í bíla. Þetta segir Jón Jónsson bifvélavirki sem ekki hefur fengið slík réttindi viðurkennd þrátt yfir að hafa setið og staðist tilskilið námskeið á bílgreinasviði Iðunnar fræðsluseturs fyrir rúmum tveimur árum.

"Kennararnir sem kenndu okkur í Borgarholtsskóla sögðu okkur að eftir námskeiðið færum við á lista Umferðarstofu sem löggiltir metanísetningar- og viðgerðarmenn. En svo þegar á reynir eru kröfurnar svo miklar hjá Umferðarstofu að ekki er hægt að verða við þeim," segir Jón.

Hann segir stranda á kröfu Umferðarstofu um að hann setji búnað í bíl og sérfræðingur þeirra taki út verkið að því loknu. "En á meðan ég er ekki á lista Umferðarstofu selja hinir aðilarnir mér ekki metanbúnað. Þannig að þetta er mótsagnakennt hjá þeim."

Við eftirgrennslan segist Jón hafa fengið þau svör hjá Umferðarstofu að sérfræðingur stofnunarinnar, sem taka á út breytinguna hjá honum, sé ekki sérmenntaður í metanfræðum. "Og það nær ekki nokkurri átt að maður sem ekki hefur réttindi skuli banna mér að vinna við þessa hluti. Svona vitlausar kröfur eru ekki til þess að flýta því að bílaflotanum verði hér breytt yfir í metan."

Um leið segist Jón hafa spurt að því hvort viðlíka reglur ætti að setja um aðra viðkvæma öryggisþætti í bílaviðgerðum, svo sem um bremsu- eða stýrisviðgerðir, en svo væri ekki. "En það væri alveg eins ástæða til að setja eins reglur um úttekt vegna svoleiðis verkefna. Annars er metanbúnaðurinn ekkert hættulegur í sjálfu sér. Maður þarf bara að vita einhver grunnatriði," segir Jón.

Egill Örn Jóhannesson, bílgreinakennari hjá Iðunni, segist sammála því að vinnubrögð Umferðarstofu séu röng þegar kemur að því að viðurkenna réttindi til metanbreytinga. Vinnulagið sem viðhaft sé torveldi þeim sem ekki vinni nú þegar á sérhæfðum breytingaverkstæðum fyrir metan að verða sér úti um réttindin. Dæmi Jóns sé ekki einsdæmi, en um þessar mundir láti annar bifvélavirki reyna á það sama eftir að hafa setið námskeið hjá Iðunni. "Þeir hjá Umferðarstofu hafa alltaf staðið á móti því að farið sé út í þessar breytingar því í einhverjum lögum segir að bannað sé að breyta eldsneytiskerfum bíla," segir hann.

Engar kvaðir vegna kaupa á búnaði

Umferðarstofa segir misskilning að til þess að fá keyptan búnað til metanbreytinga þurfi viðkomandi að vera skráður á lista stofnunarinnar yfir ísetningaraðila sem uppfylla tilskilin skilyrði. Haldi einhver slíku fram sé það hvorki frá Umferðarstofu komið né hafi þeir starfsmenn stofnunarinnar sem hafa með málaflokkinn að gera haft nokkra afspurn af því að söluaðilar geri þess konar kröfur.

Þeir sem hafa hug á að breyta bifreiðum þannig að þær gangi fyrir metangasi þurfa að uppfylla eftirtalin skilyrði Umferðarstofu:

1. Að starfsábyrgðartrygging sé í gildi.

2. Að upplýsingar um menntun séu fengnar Umferðarstofu í té.

3. Að viðkomandi hafi setið námskeið um hvernig ísetningu metans á að vera háttað og sé með staðfestingu þess efnis.

4. Að starfsstöð viðkomandi sé tekin út af fulltrúa Umferðarstofu.

5. Að fyrir liggi breytt bifreið sem nýtir metan sem orkugjafa. Þá bifreið er skylt að færa til breytingaskoðunar á skoðunarstöð í samræmi við 12. gr. reglugerðar nr. 8/2009 um skoðun ökutækja.