Aðskilnaður systkina

Í nútímaþjóðfélagi er algengt að báðir foreldrar vinni úti. Fjölskyldumynstrið getur verið flókið og eiga mörg börn tvö heimili. Yngstu borgarbúarnir verja jafnan stórum hluta af deginum í leikskóla. Starfsfólk leikskóla er mikilvægir þátttakendur í uppeldi barnanna og eru oft og tíðum þeir fullorðnu einstaklingar sem börnin okkar umgangast mest utan heimilisins. Í dag er börnum í Reykjavík úthlutað leikskólaplássi eftir aldri í takt við jafnræðisreglu stjórnsýslulaga sem fylgt er í starfi leikskóla. Þótt þessi regla eigi að gæta fyllsta réttlætis felur hún í mörgum tilvikum í sér brot á jafnræði systkina á leikskólaaldri sem eru aðskilin og innrituð hvort í sinn leikskólann.

Við innritun barna í leikskóla verður að huga að velferð, tilfinningalegum og félagslegum þroska þeirra. Stuðningur við fjölskyldur borgarinnar er mikilvægur til að skapa sterka einstaklinga frá fyrsta degi. Í flóknu nútímasamfélagi þar sem börn eru stóran hluta dagsins frá foreldrum sínum er mikilvægt að styrkja tengsl systkina og tryggja að þau deili sameiginlegum reynsluheimi. Starfsfólkið og börnin á leikskólanum eru hluti af honum.

Aðlögun

Aðlögun yngri systkina hefst um leið og þau fylgja eldri systkinum í leikskólann ásamt foreldrum sínum. Barnið lærir á staðhætti og kemur jafnvel daglega í skólann. Starfsfólk og börn skólans þekkja barnið jafnan með nafni og það upplifir öryggi sem eldra systkini á næstu deild skapar því. Tengsl systkina verða þannig meiri og því einnig um hagsmuni eldra barnsins að ræða. Það er hagur leikskólakennara að systkini séu á sama leikskóla, fjölskyldutengslin verða meiri, sem er dýrmætt fyrir starfið, og komið er í veg fyrir óhjákvæmilegan flutning barna á milli skóla og rask sem því fylgir.

Borgaryfirvöld hafa svigrúm til þess að bjóða systkinum pláss í sama leikskóla og gæta samtímis jafnræðis gagnvart öðrum börnum sem boðin er leikskóladvöl. Í reglum um innritun í leikskóla, 26. grein, segir að sveitarstjórn sé heimilt að setja reglur um innritun í leikskóla í sveitarfélaginu, enda njóti leikskóli framlags úr sveitarsjóði. Þessar reglur séu annars vegar settar með tilliti til aðstæðna barna og foreldra og hins vegar með tilliti til aðstæðna í leikskólum sveitarfélagsins.

Innritun systkina á sama leikskóla er hagur allra. Fyrst og fremst er um að ræða hagsmuni barnanna en einnig fjölskyldunnar. Þar að auki má líta á þetta frá sjónarhorni samfélagsins og vinnumarkaðarins. Starfsdagar eru ekki allir samræmdir á milli leikskóla og sumarlokun ekki endilega sú sama. Það fer meiri tími í ferðir á hverjum degi, hvort heldur gangandi, hjólandi eða akandi. Ef börn eru keyrð í leikskóla er mengunin meiri og óþarfa umferð um hverfin eykst.

Meiri akstur

Aukinn tími í akstur og jafnvel meiri vinna til að mæta auknum kostnaði, leiðir til þess að minni tími er eftir handa börnunum. Þetta fyrirkomulag veldur því að börnin eru lengur á leikskólanum dag hvern en ella. Barnmargar fjölskyldur hafa þar að auki ekki sama sveigjanleika og litlar fjölskyldur. Foreldrar verða að deila tíma sínum og athygli milli barnanna.

Í nýsamþykktum barnasáttmála Sameinuðu þjóðanna og barnaverndarlögum eru ákvæði sem kveða á um að það sem er barni fyrir bestu skuli ávallt hafa forgang þegar teknar eru ákvarðanir um málefni þess. Í samstarfslýsingu Besta flokksins og Samfylkingarinnar frá 16. júní 2010 er tilgreint að með fyrstu verkum skuli vera að taka upp að nýju systkinaforgang í leikskólum borgarinnar. Nýtt skóla- og frístundasvið Reykjavíkur var stofnað til þess að "veita börnum og fjölskyldum í borginni heildstæða þjónustu og stuðla að samfellu í öllu starfi sem hefur velferð barna að leiðarljósi", eins og segir á heimasíðu Reykjavíkurborgar. Hljómar vel, en eru þetta orðin tóm?

Miðað við núverandi ástand í Reykjavík eru mörg börn í dagvistun á þremur stöðum áður en þau byrja í grunnskóla; hjá dagforeldrum/í ungbarnaleikskóla og tveimur leikskólum vegna flutninga systkina.

Við teljum að allir sjái að það er börnunum, systkinunum, fjölskyldunum, leikskólunum, vinnuveitendunum, samfélaginu og umhverfinu fyrir bestu að vera í sama leikskóla og deila sama reynsluheiminum. Foreldraráð og foreldrafélag leikskólans Brákarborgar hafa hvatt skóla- og frístundaráð Reykjavíkurborgar til að endurskoða afstöðu sína til innritunar systkina. Við skorum á ykkur að standa vörð um hagsmuni barna og fjölskyldna borgarinnar.